Usola isikole ngokhiyelwe
UYAVEVA umzali womfundi oneminyaka emihlanu ofunda esikoleni samabanga aphansi KwaNyuswa, okuthiwa ngoMsombuluko ukhiyelwe ngephutha wobhekelele ukuphepha kwesikole endlini encane waze watholakala ngakusasa.
Umfundi esiligodlile igama lakhe owenza uGrade R eNkazimulo Primary uhlale ingxenye yosuku nobusuku bonke endlini encane ngemuva kokuvalelwa ngephutha obhekele ukuphepha kwesikole. Uvalelwe kusuka ngo-12 emini watholwa ngakusasa ngo-6 ekuseni.
Unina womfundi, obebhodla umlilo ngalesi senzo, uthe uzamile ukukhuluma nothishanhloko wesikole, kodwa wavele wathi akusilona iphutha lesikole.
“Ngikhuluma nawe nje ngikwadokotela. Izolo (ngoLwesibili) bengimhambise emtholampilo, ngoba uma edla uyabuyisa, kuthiwa ungenwe isifo samakhaza,” kusho unina.
Uthe ngesikhathi bebona kubuya izingane lo mfundi engabuyi, bathinte amaphoyisa esiteshini saseNtshangwe, kwaphunywa umkhankaso efunwa kodwa bangamthola. Kuthiwa uze watholwa nguyise ngehora lesithupha elele endlini encane, engenwe ngamakhaza engakwazi ngisho ukuma.
Uyise ukhale ngothishanhloko athe ukhombise ukungabi nabo ubuntu ngesikhathi ebikelwa ngalolu daba.
“Sizame ukuvula icala esiteshini samaphoyisa eNtshangwe, ngoba sicikwa izimpendulo zikathishomkhulu. Icala alivulwanga ngoba amaphoyisa ebedidekile ukuthi lingena ngaphansi kwamaphi amacala. Sibonga ukuthi ingane yami ngiyithole iphila. Ngiyithole ilele phansi kusimende ingambethe. Ingihlukumeze kakhulu emoyeni le nto,” kusho uyise.
Kuthiwa amalungu omphakathi avuke umbhejazane abhikisha ngaphandle kwesikole izolo, ezwakalisa ukunganeliseki ngokukhiyelwa kwengane.
UNksz Nokuthula Shangase oyilungu lesigungu esingamele isikole uthe kuvunyelwane ngokuthi isikole sithwale izindleko zokwelapha umfundi ngoba kukholakala ukuthi kube nobudedengu ngasohlangothini lwesikole.
“Sikhulumile nothishomkhulu wazehlisa ngakho yonke imali esetshenziswe abazali balo mfundi bemelapha, izobuyiswa,” kusho uNksz Shangase.
Okhulumela uMnyango wezeMfundo KwaZulu-Natal uMnuz Kwazi Mthethwa unxuse ukuthi othisha bazehlise uma bekhuluma nabazali.
“Egameni lomnyango, sifisa ukuxolisa kakhulu emndenini. Okwenzekile kubeke impilo yengane engcupheni ngoba bekungenzeka noma yini. Siyakholwa wukuthi lokhu kube yiphutha kodwa kubalulekile ukuthi abasebenzi bomnyango batshengise inhlonipho uma bekhuluma nabazali,” kusho uMthethwa.
Okhulumela amaphoyisa KwaZulu-Natal, uCaptain Nqobile Gwala, uthe: “Bekumele abazali bayobika ngokulahleka kwengane ukuze bekuzoba nokulandeleka kwalolu daba. Sinxusa umphakathi ukuthi ubike emaphoyiseni ngokushesha uma kunomuntu olahlekile.”