Kubulawe owezimo eziphuthumayo
UNGQONGQOSHE wezeMpilo KwaZulu-Natal, uDkt Sibongiseni Dhlomo usezwakalise ukushaqeka ngokubulawa komsebenzi wezimo eziphuthumayo odutshulwe washona ngaphandle kwesibhedlela i-Edendale eMgungundlovu.
UMnuz Sibusiso Mthethwa (36) obesebenzela esikhumulweni sama-ambulensi eMbali kuthiwa udutshulwe washona ngoLwesihlanu ebusuku ephuma emsebenzini.
Ngokwesitatimende esikhishwe ngumnyango, umufi udutshulwe ngabantu abangaziwa eduze kwesango lesibhedlela i-Edendale.
UDhlomo uthe bashaqekile ngokubulawa kukaMthethwa ngalolu hlobo.
“Kuyakhathaza ukuthi impilo yomuntu isishibhe ngale ndlela yokuthi izigebengu sezibonakala sengathi azicabangisisi kaningi ngaphambi kokuqeda ngempilo yomuntu,” kusho uDhlomo.
Uthe balahlekelwe ngokufa kukaMthethwa ngoba ubeyisosha ebelizinikele ekusindiseni impilo yabantu.
UDhlomo uthe ngenxa yokungabi nanhliziyo kwezigilamkhuba umndeni wakhe usulahlekelwe yindodana, wubaba nomyeni.
Uthe banethemba lokuthi abomthetho bazoqinisekisa ukuthi bayatholakala abenzi bobubi bagwetshwe.
Kuthiwa uMthethwa udutshulwe ngabalisa abebemlalele unyendle ngaphandle kwesibhedlela. Endaweni yesigameko kutholakale amagobolondo ezinhlamvu ayisikhombisa.
Okhulumela amaphoyisa KwaZulu-Natal, uLt Col Thulani Zwane, uthe amaphoyisa ayaphenya wathi akukaboshwa muntu ngalesi sehlakalo.
UMthethwa kulindeleke ukuthi afihlwe eNquthu ngeSonto kanti imizamo yokuthola umndeni wakhe ayiphumelelanga.