Aluqondwe elomnotho ezweni
ULAKA nokuphelelwa yisineke kwentsha nabantu abamnyama jikelele ngokunyonyoba kwezinhlelo zokulethwa kwezinguquko kwezomnotho kuleli lizwe naKwaZulu-Natal ikakhulukazi, kufanele sikuqonde njengenye yezinto okufanele siyinhlangano ephethe nelawula uhulumeni sizisukumele kungakapholi maseko.
Udaba lokuphuthunyiswa kwezinguquko ezinqala kwezomnotho olusematheni kulezi zinsuku, empeleni lunomlando omude lumunyungwa ezinhlakeni ezehlukene ze-ANC.
Lokhu kungenxa yokwamukela ukuthi lolu hlelo luyisikhali esimqoka ekuhlangabezaneni nenselelo yobubha, ukweswelakala kwemisebenzi nokungalingani kwethu kwezomnotho njengezakhamuzi zaseNingizimu Afrika.
Izingqungquthela ezehlukene ze-ANC sezakubeka kwacaca ukuthi sidinga ukuphakamisa izinyawo ngalolu daba.
Ingqinamba enkuluke esibhekene nayo ngeyokungaphenduleki kwabaningi ngendlela egculisayo embuzweni wokuthi kudalwa yini ukuba kuthathe isikhathi eside kangaka ukuba kubonakale izinguquko ezibambekayo emuva kweminyaka engu- 23 siphethe.
Empeleni kuningi okubambekayo osekufezekile kulo mshikashika wezinguquko ezinqala kwezomnotho.
Kodwa lolu hlelo lokuphuthunyiswa kwezinguquko ezinqala kwezomnotho kufanele siluqonde njengomzamo wokuqhubeka nokulungisa amaphutha enqubo yobandlululo anomlando omude.
Luyindlela yokwakha isizwe esingcono kunaleso esihaqwe ngukwentula imisebenzi, ububha nokungalingani kwabantu.
Umbuzo omkhulu ngowokuthi yiyiphi indlela engcono yokulungisa iphutha lokuba kube yiningi labantu baseNingizimu Afrika, okungabamnyama okuhleli emahlombe abo lo mthwalo wengcindezelo yeminyakanyaka?
Sikhuluma nje izikhundla eziphezulu zabaqondisi abaphethe amabhodi ezinkampani ziqhoqhobelwe ngabamhlophe abagweve nengxenye engu-68.5% yazo.
Uquqaba lwabamnyama luphethe kuphela ingxenye engu14.4%, kuthi amaNdiya aphathe 8.9%, kuvale amakhaladi ngo-4.9%. Abokufika abasezikhundleni eziphezulu balinganiselwa ku-3.4%.
Kungakho-ke sithi kuyaphuthuma ukuba kungene uhlelo lwezinguquko kwezomnotho ukulungisa isimo esinje ekuvulekeni kwamathuba okulawula iminxa eyehlukene ebalulekile ezweni, ngoba izinto zitshekile okwamanje.
Abamhlophe abaningi kangaka abalawulayo ezikhundleni eziphezulu empeleni baningi ngokuphindwe kasithupha kunesibalo sabakubo ababambe iqhaza ekukhandweni komnotho wezwe lethu. Ngamanye amazwi, indlu emnyama ngobuningi bayo isebenza kanzima ukukhiqiza umnotho olawulwa yidlanzana labamhlophe.
Yikho nje eNingizimu Afrika ingxenye eyiphesenti elilodwa ilawula ingxenye engu-42% yomnotho wonke wezwe.
Umzamo wokuqondisa amaphutha esawashiyelwa wubandlululo ubhekene kakhulu nanokubuyisa isithunzi namalungelo abantu ababecindezelwe. Lamalungelo aqukethwe eSahlukweni sesiBili soMthetho-sisekelo amayelana namalungelo kwezempilo, umpheme phezu kwekhanda osezingeni elifanele kanjalo nokuthola umsebenzi. Sikhuluma lapha ngamanzi nenhlanzeko nokuhlinzekwa ngezidingo zezenhlalakahle kulabo abadinga ukuxhaswa.
Ngalolu hlelo lwezinguquko ezinqala kwezemnotho senabela nasemikhakheni eyehlukene yezokulawula izwe, okubalwa kukho imigomo ephusile nokushaywa kwemithetho ezoletha izimpendulo kulesi simo esiguquguqukayo kwezenhlalo nomnotho.
Ezingxenyeni ezehlukene zesifundazwe iKZN sekuvamisile ukuba kuphazanyiswe ukusebenza kwezinkontileka ezisuke zithole amathenda emisebenzi emikhulu. Kwesinye isikhathi lokhu kuhambisana nokwesabisa ngodlame. Kanti sikhuluma nje lolo daba selufinyelele kaningana ezinkantolo ezehlukene.
Mhlawumbe yizigameko ezinje ezinganika abanye umqondo wokuthi uma sikhuluma ngokuphuthunyiswa kwezinguquko ezinqala kwezomnotho sisho umbhidlango ongahlelekile nocekela phansi umnotho. Abanye mhlawumbe bafikelwa wumqondo wokuthi sifuna kube kwampunz’edl’emini, lapho noma ngubani ezitapela lapho ethanda khona. Kakukhona lokho okuhlosiwe.
Okuqondiwe ngukuba kube nendlela ehleleke kahle, necace bha yomgudu okuhanjwa ngawo wokulethwa kwezinguquko ukuze ukwabiwa komnotho kubhekele ubulili nobuzwe kwabawulawulayo.
Zona izinguquko ezinqala ziyadingeka kungakapholiswa maseko. Kodwa ngeke uhulumeni avuke kusasa adle ngejozi noma yimuphi umhlaba noma izimayini ngaphandle kwesinxephezelo esifanele nokulandela imithetho yezwe noMthetho-sisekelo. Phela siqhuba ngohlelo lwezomnotho oluxubile, okusho ukuthi miningi iminxa ebambisene ekwakheni nasekuphatheni umnotho wezwe.
Ngeke silibale futhi ukuthi iNingizimu Afrika ivulelekile ukuhweba namanye amazwe ngokuwadayisela esikukhiqizayo. Kanti nathi kunezimpahla eziningi esizidinga kuwo. Noma kunjalo, silokhu sizibophezele ukuqikelela ukuthi kuzo zonke izinqumo esizithathayo, sibhekelele ukulungisa isimo sezinselelo esibhekene nazo, ukwesweleka kwemisebenzi, ububha nokungalingani kwezomnotho.
Kungalesi sizathu futhi sithi udaba lokubuyiselwa komhlaba kubantu luyaphuthuma ngakho malwenzeke ngesivinini esikhulu ngaphansi kwezimiso zoMthethosisekelo wezwe ngokuxoxa nabaholi bendabuko, abasingethe intuthuko yezindawo zasemakhaya nalabo abaphethe izinkampani ezishaya amaphiko kwezemihlaba nezakhiwo.
Kufanele kwakhiwe ibhange labamnyama elizobasiza bakwazi ukuthenga amasheya bakhe izimboni babe ngosomabhizinisi abasezingeni eliphakeme nabo.
Izinkampani ezinkulu ezisingethe imali, njengamabhange, silindele ukuba nazo zisondele zikhombe elazo iqhaza kulezi zinguquko ezinqala okufanele ziphuthunyiswe kwezomnotho.
Sinesibopho sokulusukumela udaba lwemali yakuleli eshushumbiselwa kwamanye amazwe ngokungemthetho. Kuyaziwa ukuthi kunezinkampani ezizinze kuleli ezikhokhobisela kwamanye amazwe izigidigidi zemali eyinzuzo eziyenza ngezithukuthuku zabantu bakuleli kodwa ezigwema ukukhokha intela.
Usuku nosuku kuvela imibiko eshaqisayo ngamatulo ezinkampani ezinkulu ezihlangana zibophe amacebo ngamanani ezimpahla ezizithengisayo okwenza kube nzima kakhulu ukuba abanye abantu bangene kuleyo mikhakha yamabhizinisi. Kuvele izindaba ezishaqisayo ngalo mkhuba wezinkampani ezinkulu ngesikhathi kwakhiwa izithabathaba zezinkundla zikanobhutshuzwayo ezisetshenziselwe iNdebe yoMhlaba ngo-2010.
Kukhulunywa lapha ngezigidigidi zoqobo zamaRandi, kanti sekusobala ukuthi lo mkhuba usabalele emikhakheni eminingi eyehlukene yamabhizinisi nezimboni.
Yizinto ezinjena-ke uhlelo lwezinguquko ezinqala kwezomnotho olubhekene nazo ngoba siphinde siqaphele ukuthi kukhona okungalungile impela uma emuva kweminyaka engu-23 sazuza umbuso wentando yabantu amaFund Manager amnyama elawula kuphela R300billion esigaxeni esingu-R6trillion ophethwe ngabathatha izinqumo ngokuthi isetshenziswa kanjani le mali engaka.
Njengenkampani egixabezwe izizumbulu zemali uhulumeni ayitshala emabhizinisini ehlukene, silindele ukuba iPublic Investment Corporation (PIC) lo R1.8trillion ewusingethe iwusebenzise ngendlela ezosisiza ukufaka umfutho owengeziwe ekulethweni kwalezi zinguquko ezinqala kwezomnotho esikhuluma ngazo.
Lisemqoka nakakhulu iqhaza le-PIC ngoba oguqukweni okubambekayo esifuna ukulubona ngukuqhibuka kosozimboni abamnyama abanohlonze abazoba sekhaleni lalezi zinguquko ezinqala kwezomnotho.
Ngeke sigculiseke ngabalikhulu kuphela okunezinhlelo zokuba babe sebekhona ngonyaka ozayo. Sincane kakhulu leso sibalo ngoba usemkhulu kakhulu umsebenzi okufanele wenziwe ukuletha uguquko lwangempela emnothweni waleli lizwe.
Sikusho lokhu ngoba manje akusafani nango-1994 lapho babeyidlanzana abamnyama ababenamakhono nolwazi oludingekayo ngokusebenza kwezimboni ezinkulu.
Ngo-2017 sekuyizinkulungwane abamnyama abahlome ngolwazi oluphelele futhi abaqeqesheke ngokufanele ukuba banikwe ithuba.
Sithinta nje lapha okumbalwa, ukweneka isithombe sokuthi kuqondweni uma kukhulunywa ngokwenza izinguquko ezinqala kwezomnotho.
Okubalulekile wukuthi njengoba siya engqungqutheleni kazwelonke ye-ANC ngoDisemba sikhumbule ngesinqumo esasithatha sigcina ukuhlangana eMangaung ngo-2012 ngalolu daba.
Empeleni sasigcizelela umgomo we-ANC kwezomnotho osuselwa ezimisweni zoMqulu weNkululeko (Freedom Charter) owasiyalela ukuthi abantu bakuleli bayohlomula bonke emnothweni wezwe. Siyakuqonda ukuthi noma kukuningi osekwenziwe, kodwa le nkululeko yomnotho esikhuluma ngayo isazothatha iminyaka ukufezeka.
Yikho nje eMangaung sivumelane ngokuthi maluphuthunyiswe uhlelo lwezinguquko ezinqala kwezomnotho ukuze sibhekane nalezi zinselelo ezintathu eside sikhuluma ngazo zobubha, ukweswelakala komsebenzi nokungalingani.
Akukho ukuhlehlela emuva ngoba isineke nokubekezela kwabantu bakithi phezu kweminyaka engaka yenhlupheko nengcindezelo kunomkhawulo. Ngeke basonge izandla unomphelo uju nezinyosi kumimilitwa ngabezizwe ezweni labo. UDkt Mkhize unguMgcinimafa we-ANC