Ubabele eHarvard oyocijwa kwezobuholi
UFUNA ukuba umholi oqotho wakusasa umfundi ona-13 ozoya eHarvard University eyofunda ngezindlela ezahlukene zokuhola.
UNksz Yamkela Nyokana (13) waseMgungundlovu uzoya kofunda eBoston. Uzohamba ngo-Julayi 19 abuye ngo-Julayi 26 nonyaka.
UYamkela ofunda uGrade 8 eRaisethorpe High, uzomela elakuleli njengoba ekhethwe ohlelweni lokucijwa kwiAmbassador Leadership. Lolu wuhlelo lokuhlomisa intsha ngamakhono okuba ngabaholi abaqotho bakusasa.
“Ngiyasaba ukuhamba ngedwa ngiye kude kangaka kodwa ngijabule ngoba ngizoya phesheya okokuqala ngiyofunda ngokuba wumholi oqotho. Okungijabulisa kakhulu wukuthi ngizohlangana nabanye abantu eHarvard, ngifunde nakubona. Ngifuna ukubuya sengikwazi ukuba umholi oqotho ekilasini nasesikoleni engifunda kuso. Ngelinye ilanga ngifisa ukuba wumholi onohlonze,” kusho uYamkela.
Uyise kaYamkela, uMnuz Lubabalo Nyokana, uthe uyaziqhenya ngendodakazi yakhe elandele abanye odadewabo ababa yingxenye yalolu hlelo.
“Ngiyajabula kakhulu ngoba uzogqugquzeleka ukuba aphumelele,” kusho uNyokana.
Odadewabo bakaYamkela u- Abongile ongunjiniyela no-Snazo ongumcwaningi mabhuku baya kulolu hlelo ngo-2010 nango-2011 ngokulandelana.
UYamkela okhonze izifundo iMaths, iSayensi ne-English uthe ufuna ukuba ngudokotela.
Abazali bakhe bakhokhele amathikithi ebhanoyi, i-visa nomuntu ozomgada phambili uma edinga usizo ngenxa yokuthi useyingane (minor), nezinye izindleko.
Lo mfundi ushodelwa umphako nezinto ezincane azohamba nazo njengoba abazali bakhe bazithuntuthile bemkhokhela izindleko zokuhamba.