Kuyoze kube nini sifa ngoba nakhu singenamali?
MHLELI: Ngithi angiphawule ngodaba lokudlula emhlabeni kukaPhindile Cele odlule ebeletha esibhedlela oSindisweni.
Kwenzeka kanjani ukuthi umuntu esikwa afike ekuseni kuze kushone ilanga enganakiwe? Kwenzeka kanjani ukuthi isibhedlela esikhulu kangaka sibe nodokotela oyedwa ekubeni kuyisibhedlela somphakathi esenganyelwe wuhulumeni wentando yeningi?
Angikhumbuli ngizwa kuthiwa ezibhedlela ezizimele kufe abantu kodwa kwezikahulumeni kubikwa mihla namalanga.
Angikhumbuli futhi kukhona osebenzela uhulumeni kuthiwa ulaliswe esibhedlela sikahulumeni.
Nabo abazifuni ngoba bayazi ukuthi impatho khona ayikho futhi yena uhulumeni ubanikeza ama-medical aid ukuze bangayi ezibhedlela zakhe.
Ngisho nabasebenzi bakhona ingathi basetshenziswa ngenkani noma abaholelwa ngendlela abanezinhliziyo ezincane ngayo. Baningi abangangivumela kulokhu.
Kuyoze kube nini uhulumeni wethu sifa ngoba nakhu singenamali yokuya ezibhedlela ezizimele? Ake kuye oyedwa nje kuhulumeni aye ezibhedlela zikahulumeni abone ubuningi babantu behlezi emabhentshini besezinhlungwini belindele usizo. Ubone onesi behla benyuka ungazi nokuthi benzani. Umuntu afike ekuseni esezinhlungwini kuze kushone ilanga engasizakalanga.
Laba abakuhulumeni bayasazi lesi simo ngoba iningi labo laqala lahlupheka ngaphambi kokuba kuhulumeni kodwa uma sebekhethiwe bayishaya indiva imiphakathi abasuka kuyo. Ngixolise ukwelula, ngenziwa wulaka nobuhlungu ngohulumeni wethu. Ngidlulisa namazwi enduduzo emndenini wakwaCele. M V. Mkhize EVERULAM