Injabulo bexhaswa ngemishini

BASWELE amaphiko okundiza osomabhizinisi bemifelandawonye abathole uxhaso lwemishini noqeqesho olubize R2million kwabakwaTransnet Port Terminals (TPT), Coastal TVET College eseHammarsdale noMnyango wezokuThuthukiswa koMnotho, ezokuVakasha neMvelo.

UNkk Jellita Dlamini onguSihlalo weSibambisane CC ethole umshini wokwenza i-barb wire utshele Isolezwe ukuthi bajabule ngokuthola lo mshini ngoba bazokwenza into ethengwa unyaka wonke.

ISibambisane CC, isebenzela esigodini saseLubisi, oPhongolo.

Uthe iSibambisane CC yasungulwa ngo-2010 ngamalungu amahlanu okukhona abadala ababili, yintsha entathu okukhona noyedwa okhubazekile kubo. “Sazisungulela ibhizinisi lethu ngaphandle kokucela uxhaso emabhange.”

AbakwaTPT baveze ukuthi uMnyango wezokuThuthukiswa koMnotho, ezokuVakasha neMvelo KwaZulu-Natal nabaseCoastal TVET College eHammarsdale banohlelo lokuqeqesha intsha nabesifazane basemakhaya oseludle ngaphezu kuka-R2million kanti bona (TPT) baletha imishini ezosiza osomabhizinisi asebeqeqeshiwe ukuthi baqhubeke nezinhlelo ezizobangenisela imali. Bathe banikele ngomshini wokwakha i-barb wire nowakha amathishu.

UNkk Thandi Sabelo oyi-Executive Manager for Procurement kwaTPT uthe uhlelo luqale ngo-2013 kanti isigaba sokuqala bekuwukuqeqeshwa kosomabhizinisi, esesibili wukunikwa kwabo imishini bese esesithathu esokuqinisekisa ukuthi amabhizinisi abo ayaphumelela.

Uthe banikele ngemishini ukuze kuvulele amathuba emisebenzi nokufukula imiphakathi yasemakhaya.

AbakwaTPT bazonikelela nezinye izinkampani ezenza imikhiqizo ehlukahlukene okubalwa iWoman’s Vision Co-Op eseHammarsdale neZikhuthaze eseMgungundlovu ezenza i-barb wire.

ILufuno Holdings Co-Op neKhazimulusa Chemicals Co-Op abenza ithishu bahlomule ngemishini yabo ngoNovemba wonyaka odlule.

BAYAJABULA ukuthi sebezozakhela i-barb wire ngomshini abawunikelelwe abakwa-TPT abeSibambisane CC. Esithombeni yiPhini leMeya yasoPhongolo uNkk Busisiwe Mvelase, uMnuz Sandile Biyela wakwaTPT, uNkk Thandi Sabelo wakwaTPT noNkk Jellita Dlamini...