Osomabhizinisi bakhala ngokuqolwa
BAKHALA ngokuqolwa yinkampani eyenza imishini yokukhokha ngekhadi eshibhile ebizwa nge-iKhokha osomabhizinisi abancane emuva kokuvela kwezindaba zokuthi kunomshini omusha iKhokha Mover obiza u-R1 250.
Labo somabhizinisi abangathandanga ukudalulwa amagama bathenge umshini obizwa nge-iKhokha ngonyaka odlule ngo-R1 750 kanti manje kufanele bakhokhe u-R1 250 ukuze bathole umshini omusha iKhokha Mover.
Okucasula osomabhizinisi wukuthi uma sebekhokhe u-R1 250 bazohambisa umshini omdala kwa-iKhokha bese benikezwa omusha.
“Sibona sengathi siyaqolwa ngabakwa-iKhokha ngoba bafuna siwukhokhele umshini omusha bese sibanikeza omdala. Okusiphatha kabi wukuthi omdala siwuthenge ngonyaka odlule ngo-R1 750 emuva kokubona udaba kwiSolezwe. Kungani kufanele sikhokhele imishini emibili ekubeni sizothola owodwa? Kungani bengafaki ubuchwepheshe obusha kule mishini emidala kunokuthi basikhokhise enye imali?” kubuza omunye wosomabhizinisi.
IKhokha Mover kuvele ukuthi iyashesha futhi iyakwazi ukusebenzisa i-blue tooth, inezinombolo ezinkulu ne-battery ehlala usuku lonke enebhathini lokuyicima nokuyikhanyisa.
UMnuz Ramsey Daly onguMqondisi wezokuKhangisa kwa-iKhokha ucele osomabhizinisi ukuthi babathinte uma benemibuzo ngalolu hlelo lwemishini emisha.
“Osomabhizinisi akumele babone sengathi siyabaqola ngoba abaphoqelekile ukuthi bathenge imishini emisha ngoba sisazoqhubeka nokubeseka uma besebenzisa emidala. Okuhle ngemishini emisha wukuthi inobuchwepheshe besimanje. Imishini emisha izodayiswa ngoR2 399 kodwa osomabhizinisi abanemishini ye-iKhokha njengamanje sizobadayisela ngoR1 250,” kusho uDaly.