Sebenzani manje abakhula bengosaziwayo?
KUNOSAZIWAYO abayibambe kwezikaqedisizungu kusukela besebancane futhi namanje basayibambile.
Badlule ezintweni ezahlukene ukuze bafike lapho bekhona namhlanje futhi nasesikoleni bayile.
Umculi wekwaito uMsawawa (27) owangena emculweni eneminyaka engu-10 uthe akabanga naso isikhathi samathoyizi ngesikhathi ekhula.
Uthe into eyaba nzima empilweni yakhe kwaba wukusuka eGoli ngo-2010, indawo ayesehlale kuyo iminyaka engu-10, abuyele eThekwini njengoba ekhaya kuseClermont.
Uthe kwakufana nokuthi uqala kabusha impilo kodwa kwasebenzeka ngoba wafikela ezandleni zikaMdu Ngcobo ongumnikazi wenkampani yokuqopha iBig Touch Africa Records.
UMsawawa uthe ngemali ayithole emculweni ukwaze ukuvula indawo yobumnandi iMsawawa’s Corner, eClermont.
Uthe okubalulekile ukuze uphumelele ukuthi uqhamuke nezinto ezintsha ngaso sonke isikhathi.
Lo mculi ugqame ngengoma ethi Bibo, Sodl’imali Senze Kanje nezinye.
“Nginengoma entsha ethi Umdanso Omusha ehambisana nomdanso wakhona,” kusho uMsawawa.
UMzambiya (30), owangena emculweni esemncane, uthe akukho azisola ngakho ngokuduma esemncane kodwa kwakunobunzima bakhona. Uthe okubalulekile ukungakhohlwa indlela okhule ngayo ekhaya futhi ube nenhlonipho. Uthe ubonga abantu abamsizile nabamesekayo okunguNimrod Nkosi, Kabelo Mabalane, intombi yakhe nomndeni wakhe.
Uthe njengamanje uhlela ukuvula inkampani yokuqopha ukuze avundulule ithalente elisha. USiwe Cele (18) ungene emsakazweni omkhulu kuleli uKhozi FM eneminyaka engu-14. Njengamanje le ntokazi yethula uhlelo iTeen Zone ngoMgqibelo ekuseni. Uthe imali uqale ukuba nayo esemncane futhi uyayilondoloza enye asize ngayo izidingo zasekhaya.
Uthe okwenze wangaba nankinga wukuthi abazali bakhe bayamseka kukho konke akwenzayo.
Ngonyaka odlule uSiwe uphothule u-matric wakhe wadabula o-A abathathu. Njengamanje ufundela ukuba wummeli.
Uthe abantu abasha kumele bazazi ukuthi bangobani nokuthi bafunani empilweni futhi akukho okungabavimba ukufeza amaphupho abo.
Umculi wowokholo uDumi Mkokstad (27) owakhipha i-albhamu yakhe yokuqala eneminyaka engu-10 uthe ubunzima abhekana nabo ekhula kwaba wukuthi abantu babembona kuthelevishini bezitshela ukuthi unayo yonke into ayidingayo.
“Ukuba kuthelevishini kwakungasho lutho. Ngangihlekwa futhi ngidelelwa yizingane ‘ezingcono’ esikoleni,” kusho uDumi.
Uthe kunesikhathi lapho ake agxila khona ebholeni ngoba wayenephupho koludlala kwiPSL futhi wakhohlwa isonto.
Uthe lokhu kwavulela ithuba omubi ukuthi amsebenzise kodwa ngenxa yokuthi wayekhumbula ukuthi ngeke enze lutho ngaphandle kukaNkulunkulu, wabuyela enkonzweni. Uthe izimo ezimbi ezenzeka kuleli zimphatha kabi.
“Ngithanda ukucela intsha ukuthi ilwe nakho konke lokhu esibhekene nakho okuwukubulawa kwabesifazane nezingane. Ngicabanga ukuthi njengabantu abasha kumele sisukume silwe nalokhu kodwa okubalulekile kumele sithandaze njengesizwe sicele umusa kaNkulunkulu.”