Ukhathazekile ngabashaye udaka
INHLOKO yethimba labaqoki kumaProteas, uLinda Zondi, ikhathazekile ngabadlali abanamava abashaye into ephansi kuchungechunge lwemidlalo emithathu ye-T20.
AmaProteas athelwe othulini ngo 2-1 kuchungechunge lwemidlalo emithathu ye-T20 abeyidlala ne-England ekuhambeni. Elakuleli belibophele iqembu elakhiwe ngabadlali abanamava nabasathuka isisinga.
UZondi uthe kubaphatha kabi ukungenzi kahle kwabadlali abadala eqenjini.
“Ziningi izinto ezinhle esizifundile yize sidliwe. Phakathi kwezinto ezisijabulisile wukubona abashwibi bethu beshwiba kahle ngaphansi kwengcindezi nangasekupheleni komdlalo. Esikhathini esedlule besihluleka wukumelana nengcindezi ngasekupheleni komdlalo. Osekumqoka manje wukuthi senze izinto ezibukeka zincane kodwa ezimqoka njengokunqaka kahle ibhola, wukuqala kahle ngebhola nangokufunda isimo somdlalo ngebhethi. Into esikhathazile ngabadlali abanesipiliyoni abangazange benze kahle,” kusho uZondi.
Kubadlali abangazange benze kahle kukhona uDavid Miller, Morne Morkel no-Imran Tahir. UMiller ushaye amarun angu-24 emidlalweni emithathu. Kowokuqala ushaye ama-run ayisishiyagalolunye kwathi kowesibili washaya ayisishiyagalombili njengoba kowokugcina ethole ayisikhombisa.
UTahir uthathe iwikhethi eyodwa emidlalweni emibili. Ushwibe ama-over ayisishiyagalombili wadedela amarun angu-75. UMorkel naye uthathe iwikhethi eyodwa kuma-over ayisishiyagalombili. Udedele amarun angu-75.
U-AB de Villiers udlale kahle eshaya ama-run angu146 emidlalweni emithathu. Kowokuqala ushaye ama-run angu65, kowesibili washaya angu-46 kowesithathu wabhala angu-35.
“Yize sisalakha iqembu le T20 kodwa lokho akusho ukuthi ukushaywa kumele sikwamukele kalula. Okuhle sesibonile ukuthi ngobani abadlali abahle beT20 ngobani futhi abafanelwe wukudlala imidlalo yosuku olulodwa,” kusho uZondi.
Indebe yoMhlaba yeT20 ezayo ingo-2020 e-Australia.