UKadodia ulinde isinqumo sikaLentjies
USIHLALO weMaritzburg United,uFarouk Kadodia, ulinde ukaputeni waleli qembu, uKurt Lentjies, ukuthi abacacisele ngekusasa lakhe kulandela imibiko yokuthi usesayine inkontileka neChippa United.
ULentjies ungomunye wabadlali abashaye into ecokeme ngesizini ka-2016/2017, iTeam of Choice eqede kuyona endaweni yesikhombisa ku-log ye-Absa Premiership. Inkontileka yakhe iyaphela neMaritzburg kodwa inombandela wokuyivuselela. Emasontweni adlule usihlalo weChippa, uSiviwe Mpengesi, umemezele ukuthi usebambe ufishi omkhulu kuLentjies. Ngaphambi kokuphela kwesizini kuvelile ukuthi iChippa neCape Town City bacathamela uLentjies owagqama kuMamelodi Sundowns esafika kuPremiership.
“Sinohlelo oluvulelekile zinhlangothi zombili. Uma kukhona uhlangothi olungajabule, iqembu noma umdlali, uyovuma ukuthi kuhlukwanwe,” kusho uKadodia.
“Kodwa sisadinga ukuhlala phansi noKurt sikhulume ngoba simnike isikhathi sokubhekisisa ikusasa lakhe ngaphambi kokuthi iqembu limphoqe ukwelula inkontileka yakhe. Inkontileka yakhe inombandela wokuyivuselela ngakho izinhlangothi zombili kufanele zivumelane.”
Emasontweni adlule uLentjies uphumele obala kuleli phephandaba wakuphika ukuthi usayine inkontileka neChippa. ITeam of Choice ivule ngoLwesibili ukuzoqala amalungiselelo esizini ka-2017/2018. Imemezele uFadlu Davids, okuphele isizini edlule eyibamba, njengomqeqeshi ozothatha izintambo zokupheka leli qembu ngokugcwele. Ngaphandle kwalokho iMaritzburg izomemezela abadlali abasha nabazolishiya leli qembu. Isivele idedele uHappy Mashau noTumelo Mogapi. Kubanjwe umoya ngoEvans Rusike ofunwa yiKaizer Chiefs. ITeam of Choice izovula isizini neMamelodi Sundowns emdlalweni weMTN 8.
“Uma iqembu selizinze kahle sizobheka isikwati sethu. UFadlu uzobukisisa abadlali bese siyamemezela abazosijoyina. Asifuni ukufaka ingcindezi kwabanye abadlali okwamanje,” kusho uKadodia.