Abeneme ngomyalelo wokuhlolwa kobuchopho
SEKUQUBUKE ukungenami esibhakeleni saseNingizimu Afrika ngomyalelo weBoxing South Africa (BSA) ophoqa bonke abashayisibhakela abaneminyaka engaphezu kuka-35 ukuthi balethe imiphumela yokuhlolwa kobuchopho ngaphambi kokungena eringini.
I-BSA ibhale kwi-website yayo ukuthi lokhu kuhambisana nomthetho wesibhakela sakuleli uRegulation 3 (4) oyigunyazayo ukuthi ifune imiphumela yokuhlolwa uma umshayisibhakela evuselela ilayisensi yakhe. Ngokwale nhlangano, lokhu kuyoholela ekutheni inqume ukuthi umshayisibhakela uyaqhubeka yini nokungena eringini.
Isitatimende sibhalwe ukuthi sikhishwe nguCindy Nkomo oyiDirector of Operations kwiBSA.
Ngaphandle kwesitatimende, kuthiwa kukhona nabaneminyaka engaphansi kuka-35 okusolakala ukuthi bashayeke kabi ezimpini zakamuva okuthiwa abalethe kwiBSA imiphumela yokuhlolwa kwabo ngaphansi kohlelo olubizwa nge-punishment index.
Lesi sinqumo seBSA sisuse omkhulu umsindo kubaqeqeshi, amabhokisa, izikhulu nabalandeli ikakhulukazi ezinkundleni zokuxhumana.
Kuvele ukuthi iBSA ikhiphe amagama abashayisibhakela okufanele balethe ukuhlolwa kwabo ngokwezifundazwe. I-Eastern Cape kuvele ukuthi inabashayisibhakela abangu-32 abafakiwe ohlwini.
Phakathi kwabashayisibhakela bakulesi sifundazwe abaneminyaka engaphezulu kuka-35, kukhona uMzonke Fana (43), Simpiwe Vetyeka (36), no-Ali Funeka (39).
Leli phephandaba lithole ukuthi amagama amabhokisa anikezwe nezimenenja zezifundazwe.
Kubashayisibhakela baKwaZulu-Natal kuthiwa kukhona umpetha we-SA middleweight uChristopher Buthelezi noMoruti Mthalane ophethe ibhande le-International Boxing Organisation (IBO) flyweight.
Enye yezimenenja ecele ukungadalulwa izwakalise ukudinwa ngesenzo seBSA.
“Amabhokisa kufanele ayilwe le nto.
“Uma emaningi kangaka angeke alwe uma engayilethile imiphumela yokuhlolwa kusho ukuthi ngeke kube nesibhakela. Laba bantu bayasibulala isibhakela. Ngokwami kufanele imiphumela yokuhlolwa kobuchopho ilethwe uma kuvuselelwa amalayisensi,” kusho le nemenja.
Isikhulu esiphezulu seBSA, uTsholofelo Lejaka, sithe zingamane zingabikhona izimpi kunokuthi babeke impilo yamabhokisa engcupheni.
“Omunye wemisebenzi yethu ukwenza isiqiniseko sokuthi amabhokisa avikelekile. Lesi yisinqumo sebhodi.
“Uma umshayisibhakela esengaphezu kuka-35 kufanele asilethele imiphumela yokuhlolwa kobuchopho ngoba sinakho ukuthi kuyona yonke leminyaka esesibhakeleni kungenzeka ukuthi ushayekile.
“Lokhu sikwenzela ukuvikela yena. Sabatshela ngesikhathi bevuselela amalayisensi ukuthi sizobanika wona kodwa kufanele basilethele imiphumela edingekayo. Ngokujwayelekile amabhokisa aletha imiphumela ye-Hepatitis B neye-HIV kodwa abaneminyaka engaphezu kuka-35 nalabo esisola ukuthi bashayekile, kufanele benze neyobuchopho,” kusho uLejaka.
UButhelezi uvumile ukuthi incwadi yeBSA uyitholile, wathi uzoyihambisa imiphumela ukuze ezovikela ibhande lakhe kuBared van Rooyen empini ehlongozwayo.