Ufunwa yiqembu laseChina uDikgacoi
UFUNWA yiqembu laseChina iShenzhen FC umdlali osezingxoxweni neMamelodi Sundowns uKagisho “KG” Dikgacoi.
U-KG (32) ubuye eNingizimu Afrika ngoJanuwari ephuma e-England. Ujoyine iqembu lakhe elidala iLamontville Golden Arrows. Kuleli qembu ufike wahlushwa wukulimala okuholele ekutheni abe nemidlalo emincane.
Inkontileka yakhe igcine ingavuselelwanga kuBafana Bes’thende okuvela ukuthi bebemholela itshe lemali.
Isolezwe ngoMgqibelo libike ngodaba lukaKG uxoxa neSundowns njengoba uPitso “Jingles” Mosimane noManqoba “TV” Mngqithi bemazi ukusuka nokuhlala.
Izolo Isolezwe lihabule izindaba zokuthi ukuthi uKG usethole isicelo eqenjini eligijima eligini yaseChina.
“Kuneqembu laseChina elicijwa nguSven Goran Eriksson elifuna uDikgacoi. Lisanda kuthumela imenenja yakhe i-email liveza intshisekelo yokumthenga. Njengamanje inkinga wukuthi usaxoxa neSundowns njengoba wazi ukuthi uPitso ubemthanda kwiBafana kanti uMngqithi nguyena owamvulela amathuba okuyodlala phesheya kwezilwandle,” kusho umthombo.
Iligi yaseChina okuthiwa imali ikhiwa ngamafosholo, isizakhele igama ngokuheha abadlali abanegama. Phakathi kwabadlali abanohlonze abagijima eChina kukhona u-Oscar waseBrazil, Carlos Tevez wase-Argentina noJohn Obi Mikel waseNigeria.
U-Eriksson uzakhele igama emaqenjini amakhulu afana noMachester City yase-England, Roma neLazio okungamaqembu ase-Italy, Benfica okuyizinkunzi zasePortugal naseqenjini lesizwe lase-England.
Lolu qweqwe lomqeqeshi luke lacija ngisho iqembu lesizwe laseIvory Coast.
ULwazi Mazibuko ophethe izindaba zikaDikgacio uphinde wacela ukungaphawuli ngekusasa likaDikgacoi ngoba inkontileka yakhe iphela ngoLwesine ne-Arrows. UDikgacoi ucingo lwakhe belukhala lungabanjwa.