Kuxwayiswa abazohambela owamahhashi
UKUYA kwiVodacom Durban July (VDJ) akusho ukuthi usebenzise yonke imali onayo, kuthi uma sekudlula impelasonto yayo uzithole usungenalo nesenti, usuboleka nakubangani.
Empeleni kuningi okukhiphisa imali, okumele ube nakho uma uzoya kule ndumezulu yomcimbi oba seThekwini. Kunalabo abacabanga ngezimpahla ezintsha ngaso sonke isikhathi uma kuzoba neVDJ.
USimphiwe Majola weThe Alore Group ebhekelele itende eliphethe osaziwayo kwiVDJ, iJack Daniels Boom Town, uthe abantu kufanele bahlanganise izimpahla zabo abanazo ngoba asikho isidingo sokuthenga okusha, inqobo nje uma ukwazi ukuhlanganisa indwangu.
“Asikho isidingo sokuyothenga izimpahla ezintsha uma uya kwiJuly ngoba kumele ugqokele umzimba wakho bese uhlanganisa kahle ukotini. Kumele uhlanganise izinto zakho ngobuciko ngoba ungafaka ngisho intambo entanyeni uma ufuna ukuhambisana nendikimba ethi The Colour of Magic. Uma uyintokazi ungagqoka ingubo ezokufanela, ingaba nemibala eminingi noma enowodwa inqobo nje uma ikufanela. Inhloso yokuya kwiJuly wukujabula, ushuthe nezithombe. Uma ugqokele umzimba wakho, ufake nesicathulo esingakumpintshi uzojabula, kwazise kwehliwa kwenyuka isicathulo esisha singakufaka enkingeni ngoba sisuke singakanwebeki ngokwanele, abanye bagcina beziphethe ngezandla,” kusho uSimphiwe. Uthe miningi imicimbi eba khona, ngabe wenza iphutha uma ungahlale uthenga izimpahla ezintsha ekubeni zikhona oke wazisebenzisa.
Uphethe ngokuthi kuyasiza ukushiya imoto ekhaya uhambe ngecab ngoba kuba yinkinga ukuthola indawo yokupaka kwiVDJ.
UVista Kalipha wenkampani esebenza nosaziwayo i-On Point PR, uthe enye indlela yokubalekela ukumosha imali ngosuku olulodwa ukudlala imincintiswano.
UVista ongaphuthwa yiVDJ utshele Isolezwe ukuthi abantu kufanele bafunde amaphephandaba ngoba kuba nemincintiswano abangathi uma bewina baphathiswe okwezitatanyiswa kwiVDJ.
“Uma ufuna ukuya kwiJuly kodwa ungenayo imali eningi kufanele ungenele imincintiswano eyenziwa ngamaphephandaba esebenzisana nezinkampani ezihlukahlukene. Isolezwe liba nemincintiswano okuthi uma uyingenele ungene mahhala ematendeni okungenwa kuwo ngoR2000. Uma usungene mahhala uthola ukudla, iziphuzo nokujabula nosaziwayo,” kusho uVista.
Uthe iVDJ wumjaho omkhulukazi eNingizimu Afrika ojatshulelwa yiwo wonke umuntu ngakho abantu akumele bazilambise ukuze baye kuwo.
Amathikithi okungena eGreyville Racecourse abiza u-R220 kanti le mali ayifaki eyokungena ematendeni ngoba nawo anemali yawo eceleni.
UNkk Gill Mostert obhekelele ezokuxhumana kwaGold Circle okuyinkampani ephethe iVDJ, uthe kumi ngomumo ngamalungiselelo alo mjaho namatende asexhunyiwe.
Uthe kuqashwe abapheki abangu-40 abazopheka ukudla okuhlukahlukene okungu-15 000. Kuqashwe oweta abangu-350, kwathengwa obhiya abangu-18 000, amabhodlela amanzi angu-25 000, ogologo abangu-2 500, amabhodlela ewayini angu-600, amalitha angu100 ejusi, amalitha angu-600 obisi, kuzophakwa amapleti angu-8000 erayisi, u-750kg wenyama yenkukhu, u-150kg wama-prawns, u-300kg we-crayfish, ophaya abangu-5000, ama-burger angu-2000, ama-bread roll angu-7000, izinkomishi zetiye ezingu-3000 nokunye okuningi.
Lokhu kudla kwenzelwa abantu abazobe besezindaweni eziphethwe yiGold Circle akubaliwe okuzobe kudliwa ematendeni.