Owakuleli uhlonishwe yinyuvesi yaphesheya
UCHONYWE uphaphe lwegwalagwala ngokuba ngomunye wabafundi abenze kahle kakhulu enyuvesi ethathwa njengehamba phambili emhlabeni.
UMonde Nkosi (27) waseKloof, owayefunda eKearsney uhlonishwe ngokuba yi- Arjay Miller Scholar, ehlonishwa yiGraduate School of Business eNyuvesi yaseStanford.
Ubenza iziqu iMaster of Business Administration neMaster of Arts in Education kanye kanye. Ube ngumfundi wokuqala wakuleli ukuhlonishwa ngalolu hlobo yinyuvesi yaphesheya.
“Ngifake isicelo sokufunda eHarvard naseStanford, ngenhlanhla ngamukelwa kuwona womabili amanyuvesi. Ngikhethe iStanford ngoba yangivumele ukuthi ngenze lezi ziqu kanye kanye,” kusho uNkosi.
Ngesikhathi esengumfundi eKearsney, uthole umfundaze ngenxa yokuphumelela kahle ezifundweni zakhe.
“Ngithanda ukubonga kulowo owaqala ukuthi kube khona imifundaze ukusiza abanye kwezemfundo,” kusho uNkosi.
Uthe umndeni wakhe yiwona owenze abe nentshisekelo yokusebenza kwezemfundo.
“Ugogo wami wayenguthisha, kanti umama unikele impilo yakhe yonke kwezemfundo kangangoba waqala isikole endaweni yasemakhaya, eJozini. Nakuba kuke kwaqala kwaba nezinkinga kodwa ugogo nomama bakwazile ukuzixazulula. Engxenyeni yezwekazi i-Afrika, e- sub-Sahara Afrika kunezikole eziningi zokuphiphitha kodwa isibalo sabamukelwa emanyuvesi asenele. Lokhu sekucacile, leli gebe ngeke livalwe nguhulumeni yedwa yingakho ngifuna ukugxila ekukhuliseni izinga lokwemukelwa emanyuvesi kwabafundi, ngokuthi kube khona izikhungo ezizimele ezizonikeza imfundo eseqophelweni eliphezulu,” kuchaza uNkosi.
UNkosi usebenza enkampanini etshalwa imali eseSan Fransisco, e-USA.
Ngemuva kokuphothula iziqu zeBachelor of Business Science eNyuvesi yaseCape Town ngo-2011, usebenze kwenye yezinkampani eluleka ngamaqhinga ahamba phambili.
“Umama nguyena umuntu engibukela kuyena. Kodwa ngigqugquzelwa kakhulu yindodakazi yami engifisa ukuba yisibonelo esihle kuyo,” kuqhuba uNkosi.
Ngaphandle ngokubonga abasunguli bomfundaze omsize kusuka esikoleni samabanga aphakeme nasemanyuvesi, kubalwa neNyuvesi yaseStanford, uphinde waqhakambisa uxhaso aluthole kunkosikazi wakhe uNyaki, abazali bakhe uMnuz Phillip noNkk Nomusa Nkosi nodadewabo abadala uZee, u-Ayanda noZanele.