UGould unikwe inkontilela yonyaka
UNIKWE inkontileka yonyaka owodwa kuSuperSport United uMorgan Gould ojoyine iqembu ekuqaleni kwesizini edlule.
Ngesizini ka-2015/2016 uGould ufakwe ohlwini lwabadlali abebengekho ezinhlelweni zomqeqeshi waMakhosi uSteve “Mphathi” Komphela.
ISuperSport ayedlala kuyona ngaphambi kokuthi ajoyine Amakhosi imtakulile imnika inkontileka yonyaka. Inkontileka yakhe neSuperSport iyaphela namuhla. UStanley Matthews oyisikhulu esiphezulu kuSuperSport utshele Isolezwe inkontileka kaGould ngonyaka owodwa.
Isitobha sibambe elikhulu iqhaza iSuperSport ifinyelela emidlalweni emibili yamanqamu eyehlukene. KuTelkom Knockout iSuperSport ithelwe othulini yiCape Town City ngo 2-1 kwathi koweNedbank Cup yalobola i-Orlando Pirates ngo 4-1 eMoses Mabhida Stadium, eThekwini, ngempelasonto edlule.
“UMorgan Gould simnike inkontileka yonyaka owodwa. Udlale kahle kakhulu. Uyibambise okweqhawe emuva kule sizini. ukuthi izovuselwe Yingakho simbonge ngokuthi siphinde simnike omunye unyaka,” kusho uMatthews. UGould ubenqoba isicoco sakhe sesithathu seNedbank Cup selokhu yaqala ukuxhaswa ngabakwaNedbank ngo-2008. Ngesikhathi Amatsatsantsa A Pitori eba ngompetha bomqhudelwano ngo-2012 e-Orlando Stadium, uGould nguyena owayengukaputeni weSuperSport. Ngo-2013 uphinde wahlabana ngesicoco esifanayo ngesizini yakhe yokuqala kuChiefs. “Ngiyaziqhenya ngendlela azinikele ngayo. Besingeke sikwazi ukungamniki omunye unyaka ngemuva kwesizini enhle abe nayo. Angingabazi ukuthi nangesizini ezayo isipiliyoni sakhe sizolisiza kakhulu iqembu,” kusho uMatthews. UGould kuzobhekwa ukuthi aphinde akhombise ubuholi uma i-United isibhekene neHoroya FC yaseGuinea emdlalweni weCaf Confederation Cup kusasa ekuhambeni ngo-5 ntambama.