AbakwaMercedese Benz bethule i-E-Coupe eNingizimu Afrika
E-CLASS COUPE ENYE I-E-Class eyethulwe eMzansi yile ebizwa nge-E-Coupe okusho ukuthi inezicabha ezimbili futhi idonsa amehlo ngobuhle obedlulele.
Isakhiwo sayo asikude nalesi se-S-Class Coupe ehamba phambili ngesitayela. Uma ubheka isakhiwo uthola amaqhuzu akhombisa amandla kwiBonnet abizwa ngama-Power domes. Uthola amalambu e-LED bese kuthi eceleni uthole amawindi amane nezicabha ezimbili ezingahlangene nokhakhayi (frameless windows).
Ukhakhayi lwehla ngokushelela luyohlangana nengemumva lapho uthola amathoshi e-LED namapayipi amabili ame nhlangothi zombili. Amasondo efika nayo aqala ku-17 agcine ku 20-inch ngobukhulu.
Ingaphakathi lithathele kumaE-Class ejwayelekile ngokuhleleka kahle kodwa ukuyihlukanisa, i-ECoupe inesiphehli moya esinamavents amise okwenjini yebhanoyi, okuyibeka ezingeni eliphezulu ngesitayela. Kunama-screen amabili phambili kukamshayeli, ayi HD 12.3-inch akhombisa ijubane, Navigation nokulawuleka komsakazo.
Uma uthanda, uyakwazi ukulawula umsakazo ngokuthinta ama-screen amancane abekwe kwi-steering. I-E Coupe ithatha abantu abane ezihlalweni ezine lapho ezangaphambili zimise okwezimoto zomjaho. I-AvantGarde trim ifika kuzo zonke izinhlobo ze-E Coupe.
Izinjini ezitholakala eMzansi namandla azo:
Kukhona i-E 220 d engu-2 litre ephuma namasilinda amane. Inamandla angu-143 kW netorque ka-400 Nm.
Ngebanga lika-100km isebenzisa uphethroli ongu-4.0. Ijubane layo elikhulu ngu-242 km/h kanti ukusuka ku-0 iye ku-100km/h kuyithatha imizuzwana engu-7.4.
Enye yi-E 200 enenjini engu2 litre enamasilinda amane. Amandla ayo angu-135 kW netorque engu-300 Nm. Ngebanga lika-100km bathi isebenzisa amalitha angu-7.8. Ijubane layo ligcina ku-240 km/h kanti ukusuka ku-0 iye ku-100km/h ithatha imuzuzwana engu-7.8.
Eyesithathu yi-E300 nayo enenjini engu-2 litre enamasilinda amane. Amandla ayo angu-180 kW netorque engu-370 Nm. Ngebanga lika-100km bathi iphuza amalitha angu-6.4 kaphethroli. ijubane layo ligcina ku-250 km/h kanti ukusuka ku-0 iye ku-100km/h kuyithatha imizuzwana engu-6.4.
Eyokugcina yi-E 400 4MATIC enenjini engu-3 litre V6 Bi-Turbo. Ifuqa amandla angu-245 netorque ka-480 Nm. Bathi isebenzisa amalitha angu-8.1 kaphethroli ngebanga lika-100km. Ijubane layo elikhulu ngu-250 Nm kanti ukusuka ku-0 iye ku-100km/h kuyithatha imuzuzwana engu-5.3
Wonke ama E-Class Coupe afika no-gearbox ozishintshayo oyi 9G-Tronic onamagiya ayisishiyagalolunye. Uhlobo lwe-E220d, E200 ne E300 ludonsa ngamasondo angemumva bese kuthi i-E400 isebenzisa i-All-wheeldrive 4Matic edonsa ngamasondo womane. I-E Coupe ifika ne-Direct Control suspension okwenza ibambelele emakhoneni kwathi onjiniyela banyusa ukuvuleka kwesuspension ngaphambili ukusiza ukushesha emakhoneni. Amanani: E 200 R754 500 E 220 d R806 500 E 300 R842 500 E 400 4MATIC R1 021 500 Wonke ama E-Class (E63s, E43 ne E-Coupe) afika ne PremiumDrive 6-years/100,000 km maintenance plan.