AboKhozi FM nethuba elingandele bani kubafundi
BALIBONA lizobavulela iminyango ebheke empumelelweni ithuba lokusebenza isikhashana oKhozini FM, abafundi abane basezikhungweni ezahlukene zemfundo ephakeme.
Laba bafundi banqoba umncintiswano wokuyosebenza ohlelweni lwasekuseni phakathi nesonto iVuka Mzansi Breakfast Show eyethulwa nguDJ Sgqemeza.
Kukhona uSibonelo Ndlovu (28) ongumdidiyeli wemisindo eGoli, Nompumelelo Mbanjwa (25) waseBulwer nongumdidiyeli wezinhlelo, Sthembile Ngwazi (21) waseMthwalume ongumsakazi noYenziwe Ndlovu (24) waKwaHlabisa ongumfundi wezemidlalo.
USibonelo owenza unyaka wesithathu e-Academy of Sound Engineering uthe ulwazi azoluzuza luzomsiza ekutheni kube lula ukuthola umsebenzi.
UNompumelelo owenza unyaka wesithathu ezifundweni zobuntatheli eCreative Arts College uthe umsakazo yinto azifelayo ngayo.
“Ngithole ithuba lokuqonda ukuthi izinto zisebenza kanjani. Kukhule nothando lwami lomsakazo.” kuchaza uNompumelelo.
USthembile owenza unyaka wesibili ezifundweni zokutolika eDurban University of Technology uthe uyazifela ngokusakaza. Uthe uke wazama kwiRadio DUT kodwa bangamthatha.
“Lokhu kuzongivulela amathuba. Ngiyathanda ukufunda izindaba.”
UYenziwe osanda kuphothula ukufundela ubuthishela e-UNISA, uthe uyazithanda ezemidlalo. Uthe ukube ubazi ukuthi kunamathuba alolu hlobo wayezofunda izifundo ezithinta ezemidlalo.
“Kungcono manje sengithole ithuba lesikhashana lokwenza engikuthandayo. Ngizimisele ngokuqhubeka nakho ngolwazi engizoluthola.”
UDJ Sgqemeza uthe laba baqale ngoMsombuluko bazoqeda ngoJulayi 14.
Uthe bazothola ithuba lokubona ukuthi kwenzekani emsakazweni.
“Mina angilitholanga ithuba lalolu hlobo. Ukungena kwami estudiyo ngangisewindini ngibuka u-Alex Mthiyane wathumela uVictor (Molefe) ukuthi azongilanda ngizophawula ngesihloko ababekhuluma ngaso. Ngazitshela lapho ukuthi nami ngizongena emsakazweni. Manje ngihleli esihlalweni ababehleli kuso,” kusho uSgqemeza.
Nomsakazi weMetro FM uMo Flava nozakwabo uMasechaba Ndlovu nabo banikeza intsha ithuba lokusakaza.
Laba basakazi abenza iThe Drive on Metro ngo-3 kuya ku-6 ntambama phakathi nesonto, banesigaba esibizwa ngeYouth Takeover lapho kusakaza khona abaneminyaka ephakathi kuka- 17 kuya ku-35 ihora.
“Inhloso yalokhu bathi wukunika intsha amava kwezokusakaza,” kusho uMo Flava.