Kugxekwa umsakazi obize uZuma ngomkhovu
UGXEKWE nxazonke ezinkundleni zokuxhumana umsakazi weLotus FM uRavi Govender ngokudelela uMengameli Jacob Zuma wambiza ngomkhovu nangesilwane esingafundile ekhasini lakhe kuFacebook.
UGovender osakaza uhlelo i-Vinyl Countdown njalo ngoLwesihlanu phakathi kuka-7 no-9, kuthiwa ubhale ekhasini lakhe lapho egcwaneke khona uZuma kodwa wabuye wawususa ngokushesha umbhalo wakhe.
Ngemuva kokuvulwa kwengqungquthela yemigomo ye-ANC, uGovender kuthiwa ubhale kuFacebook ukuthi ‘’ngisanda kuzwa umkhovu uZuma uthula inkulumo ezindabeni, ngisizwile lesi silwane esingafundile sibhidilisha isingisi, ngisho isilima uMugabe sikhuluma kangcono kunaye’’.
Othukutheliswe yilesi senzo ozibiza ngoBejay uthe bazohlela imashi ezolibangisa ezindlini zokusakaza kwaLotus FM beyophoqa ukuthi uGovender akhonjwe indlela.
UFanaz uthe amaNdiya kumele ayeke ukulokhu echukuluza abamnyama ngoba lokho kugqugquzela inzondo endala phakathi kwalezi zinhlanga.
UMnuz Edward Zuma oyindodana kamengameli, esitatimendeni asithumelele abezindaba usigxekile isenzo sikaGovender sokubiza uyise ngomkhovu.
“Ngithathe isinqumo sokuthi ngikhiphe lesi sitatimende ngemuva kwemiyalezo engiyitholile evela emndenini, abangani, izihlobo namalungu omphakathi aseNingizimu Afrika ngombhalo kaRavi,” kusho u-Edward. U-Edward uthe badumele futhi baphoxekile yile nkulumo. “Eminyakeni eminingi edlule umndeni uhlale uhlukumezeka ngendlela ubaba adelelwa ngayo abethuli bezinhlelo emisakazweni, izintatheli, ababhali bezingosi nalabo abadwebayo, banake kwesinye isikhathi baze bafake nezinto ezithinta ucansi ngenhloso yokwehlisa isithunzi sikababa,” usho kanje.
U-Edward uthe isithanda ukubama emphinjeni indaba yokudelelwa kukayise. Wathembisa ukuthi lolu daba bazolusukumela. Okhulumela i-SABC uMnuz Kaizer Kganyago uthe bayazi ngodaba, wengeza ngokuthi ngokwabo lolu daba ludinga ihhovisi labo likandabazabantu.