Imibuzo kwabafuna ukuhola kwi-ANC
BAZOPHOSWA imibuzo kubhekwe nomlando wabo kwi-ANC bonke abazongenela izikhundla zokuhola inhlangano engqungqutheleni ye-ANC eGoli ngoDisemba.
I-ANC izosungula ikomiti elizocubungula lihlome imibuzo bonke labo abafuna ukuba ngabaholi ukuze kwaziwe umlando namava abanawo kwi-ANC.
Lokhu kuvezwe nguMgqungquzeli we-ANC, uMnuz Fikile Mbalula, izolo esithangamini nabezindaba eNasrec, eGoli, izolo.
UMbalula uthe ikomiti elizokwenza umsebenzi lizokwakhiwa ngabantu asebemnkantshubomvu kwiANC, abangenendaba nezikhundla.
“Ikomiti lizophenya libheke nomlando walabo abafuna ukungenela izikhundla. Kuzosetshenziswa umqulu we-ANC i-Eye of the needle ukwenza lokhu. Umqulu ubalula ukuthi umuntu kumele abe neminyaka ekwi-ANC nokuthi kumele abe naziphi izikhundla,” kusho uMbalula.
Ikomiti lizokwakhiwa ngabantu abancane nabadala.
“Kodwa umsebenzi wokuqoka abaholi uzoqhubeka wenziwe ngamagatsha e-ANC. Elizokwenza ikomiti wukuthi lizophosa imibuzo libheke nomlando lisebenzisa umqulu we-ANC.”
Ubekhuluma nezintatheli ngombiko wokuvuselela i-ANC awuthule engqungqutheleni “Ziningi iziphakamiso ezenziwe kule nggqungquthela okubalwa nodaba lokunyuswa kwe-top 6. Kukhona abafuna kube namaPhini amabili kaMengameli noma kwandiswe oNobhala. Yi-ANC ezonquma ngalokhu kodwa le ngqungquthela akuyona enezwi lokugcina. Yingqungquthela yangoDisemba enezwi lokugcina.”
Uthe uma kuvunyelwana kuzochitshiyelwa umthethosisekelo we-ANC ngoDisemba.
“Uma ingxenye enkulu yengqungquthela ngoDisemba ivumelana, siyonyuswa isibalo se-Top 6. Kodwa amandla alele engqungqutheleni engoDisemba,” kusho uMbalula.
Uthe nodaba lokwehliswa kwesibalo samalungu esigungu esiphezulu luzophasiswa ngoDisemba.
Uthe udaba lokuphakanyiswa kwabaholi luzovulwa ngokusemthethweni ngoSepthemba.
Ubalule nokuthi ukuxoshwa kowayenguMengamei, uMnuz Thabo Mbeki, kwabalahlikisela ngamalungu.
Ukusho lokhu kukhona abafuna uMengameli Jacob Zuma ehambile enhlanganoweni
“UZuma useyahamba kumanje, ngoDisemba uyahamba. Ukuxoswha kukaMbeki kwasilahlekisela kakhulu. Angisho la ukuthi uZuma noMantashe (Gwede) yibona kuphela abaphikisana nokuthi uMbeki axoshwe, sonke isigungu esiphezulu savumelana ngokuthi akaxoshwe. Nami ngangihambisani nesinqumo kodwa ngoba ngangisentabeni angikwazanga ukuphefumula kodwa ukuxoshwa kukaMbeki kwasilimaza kakhulu.” SICELA niziqinisekise izinombolo eziwinile ezindaweni zeLotto ezisemthethweni. ISOLEZWE ngeke likuvumele ukuthathelwa izinyathelo zomthetho uma kwenzeke iphutha.