Ubulawe kuphangwa ushisanyama womfowabo
USHAQEKILE umphakathi waseSikhaleni obekuthiwa kuseSikhawini kudala, eNyakatho yeKwaZulu-Natal ngokudutshulwa komfowabo womnikazi kashisanyama odumile kule ndawo, obizwa ngokuthi yiKwaNembula ezintatha zayizolo.
Umthombo weSolezwe uveze ukuthi kufike amadoda amane ehamba ngemoto ehlome ngezinhlokohlela zezibhamu alalisa wonke umuntu phansi efuna imali.
Amabili kuthiwa asale emotweni kwase kungena amabili ngaphakathi.
Uthe kuyaqala ukwenzeka into efana nalena KwaNembula ngoba yindawo okujatshulwa kuyona kudliwe nenyama abantu bazihambele uma sebenele.
UCaptain Nqobile Gwala wamaphoyisa aKwaZulu-Natal uthe kuvulwe icala lokubulala emuva kokuthi indoda (53) idutshulwe yashona ngamadoda amabili angaziwa.
Uthe la madoda agasele kule ndawo ngabo-2.30 ekuseni athatha isamba semali esingadalulwanga.
Unxuse noma ngubani ongaba nemininingwane ngalesi sigameko ukuthi athinte amaphoyisa aseduze nayo noma afonele i-Crime Stop ku-08600 10111.
Umnikazi wale ndawo uMnuz Sipho Nembula othe akakwazi ukukhuluma ngoba unabantu lapho ekhona, usiqinisekisile isigameko wathi kubulawe umfowabo uSbusiso.
Uthe ababazi abafana akade bebabamba inkunzi ngoba nabasebenzi abababonanga kahle.
Uveze ukuthi umfowabo ubesebenza KwaNembula wase ecela noma ngubani onolwazi ukuthi athinte amaphoyisa ukuze kutholakale izigebengu.