‘Sizobhekana nabazovota naphikisayo’
NJENGOBA isihlehliselwe u-Agasti 8 inkulumo mpikiswano yokuchitha uMengameli Jacob Zuma, uMgqugquzeli we-ANC, uMnuz Fikile Mbalula, uxwayise amalungu enhlangano ePhalamende afisa ukuvota namaqembu aphikisayo ngokuthi azoshushiswa.
UMbalula uthe abamele amabhantshi noma imindeni yabo ePhalamende kodwa bamele i-ANC.
“Uma sebefuna ukuhamba, bazixoshe bona emsebenzini bazovota namaqembu aphikisayo. Ngeke sihlonize sizobhekana nabo. Asikwazi uvota ne-DA. Ukuba yilungu lePhalamende kufana nokuba umuntu ogqoke ibhomu ongayiqhumisa noma yinini, uba yidelakufa. Uma inhlangano ithi enza lokhu noma ungahambisani nakho kumele ukwenze,” kusho uMbalula.
Ukusho lokhu ekhuluma nabezindaba engqungqutheleni ye-ANC eNasrec, eGoli.
Okhulumela ihhovisi likaSomlomo wePhalamende, uMnuz Moloto Mothapo, uthe ngemuva komhlangano namaqembu ahlukene ePhalamende kuvunyelwene ngokuthi aluhlehliswe usuku lwenkulumo lube ngo-Agasti 8. Phambilini bekubekwe ukuthi izoba ngo-Agasti 3.
Uthe umnqamulajuqu wamaqembu wokuthi afisa kuvotwe ngayiphi indlela nguJulayi 14.
“USomlomo uzobe esenquma ukuthi iyiphi indlela ezolandelwa uma sekuvotwa ngaphambi kukaAgasti 8.”
UMbalula uthe amalungu e-ANC ePhalamende ezwa ngekomiti lesigungu esiphezulu.
“Ngeke sihoxise uMengameli ePhalamende noma kwi-ANC. Yingakho sithi amalungu kumele alandele lo myalelo. Isigungu esiphezulu sesibhunge kabanzi ngale ndaba kwavunyelwana ngokuthi uZuma akayi ndawo.”
Uthe wonke amalungu alandela umyalelo wamaqembu awo uma kuza ezintweni ezifuze lezi.
“Ngisho uMaimane (Mmusi-umholi we-DA) akazange amxoshe uHelen Zille (uNdunankulu waseWestern Cape) ngoba naye ulandela imigomo ethile. Nathi kwi-ANC senza lokho.”
Uthe abakwazi ukutshelwa amanye amaqembu ukuthi kumele bayilawule kanjani i-ANC.