Bathuthukisa osomabhizinisi abancane
UNGQONGQOSHE wezamabhizinisi amancane, uNkk Lindiwe Zulu, uthi into eseqhulwini emnyangweni wakhe wukukhulisa osomabhizinisi abancane nabasafufusa.
Ukusho lokhu izolo kwindlakusasa engqungqutheleni yenqubomgomo ye-ANC eNasrec, eGoli.
Uthe kubalulekile ukuthi amabhizinisi amancane athuthuke.
“Kumele amabhizinisi amancane athuthuke agcine emakhulu ikakhulu awosomabhinisi abamnyama. Yinto eseqhulwini le engeke sisuse amehlo ethu kuyo,” kusho uNkk Zulu.
Uthe labo abangafuni ukuthuthuka kumele bacabangisise kahle ngoba inhloso kahulumeni wukuthi bakhule bafane namanye amabhizinisi.
“Umnyango ubaluleke kakhulu ngoba selokhu wasungulwa baningi abantu abasizakalayo. Wasungulwa eminyakeni emithathu edlule ukuze ubhekane ngqo nenkinga yosomabhizinisi. Phambilini osomabhizinisi bebefakwe ngaphansi komnyango wezohwebo obekwenza bangatholi ukunakwa nosizo olufanele,” kuqhuba uNkk Zulu.
Ubonge uDkt Zweli Mkhize, onguMgcinimafa we-ANC ngokuthi ngomunye wabantu abameseka kusungulwa umnyango. “Wanginika umqulu engisenawo namanje owawuvela kwiNafcoc eyayikhala ngokuthi kubalulekile ukuthi kube nomnyango ofuze lo ukuze basizakale. Besikhona isidingo somnyango ngoba nosomabhizinisi babekhalile yingakho kumele bawusebenzise ngendlela.”
Uthe enye inhloso yomnyango wukuqinisekisa ukuthi uhulumeni uyasebenzisana nezinye izinhlaka okubalwa kuzo omasipala.
“Akukho ukusebenzisana nokubambisana phakathi kweminxa emithathu kahulumeni. Umsebenzi womnyango wukuqinisekisa ukuthi kuba nokusebenzisana kule minxa ukuze kusizakale labo abadinga usizo.”