Kuzokusiza ukuya kwaSARS uhlome ngolwazi oluphelele

EZABATHENGI

SESIFIKILE leso sikhathi sokuvakashela emahhovisi abaqoqi bentela, iSouth African Revenue Services (SARS) kanti baningi abafuna ukubuyelwa yimali kanti abanye bazothola ukuthi yibona abakweleta lesi sikhungo.

Kuleli sonto Ezabathengi zikhulume no-Advocate Eric Mkhawane oyisikhulu esiphezulu ehhovisi lomxazululi wezindaba zentela.

U-Advocate Mkhawane utshele Isolezwe ukuthi ihhovisi labo lisiza abantu abanezinkinga zentela mahhala ngazo zonke izilimi zaseNingizimu Afrika okusho ukuthi uma unenkinga awudingi ukukhuluma isiNgisi esiphezulu kodwa ungakhala ngesiZulu.

Udonse abantu ngendlebe wathi mabalandele imithetho yakwaSARS okusho ukuthi akumele benze ubugebengu ukuze babuyelwe yimali.

“Kulesi sikhathi abantu, ikakhulukazi abasebenzi, bafuna ukubuyelwa yimali kwaSARS. Ngicela baqaphele uma kunabantu ababathembisa ukuthi bazobafakela amaphepha abo kwaSARS ukuze bathole imali.

“Okokuqala abanye balabo bantu basebhizinisini ngakho bazokwenza konke okusemandleni ukuthi umuntu abuyelwe yimali eningi kwaSARS ukuze bathole inkokhelo enhle.

“Ngiyacela abantu baqaphele ngoba kubuye kuqanjwe amanga ukuze babuyelwe yimali,” kusho uMkhawane.

Uthe uma uqamba amanga kwaSARS kufana nokuthi uyadlala ngoba kulula ukuthi bathole zonke izinto othi uzenzile. Kuzothi uma bethola ukuthi uqamba amanga awukhokhanga imali eningi esibhedlela noma ebhizinisini elithile bese befuna imali yabo.

“Ukuqamba amanga kwaSARS yicala elibomvu, umuntu uvalelwa nasejele ngokukhohlisa abakwaSARS. Abantu babekwa icala lokukhwabanisa uma bekhohlisa abakwaSARS kanti uma kungumsebenzi abakwaSARS bayakwazi ukuzitapela isikweleti sabo njalo uma umuntu ehola. Ngiyacela ukuthi bakhulume iqiniso ngaso sonke isikhathi,” kuxwayisa uMkhawane.

Uthe abantu kufanele bawubheke kahle umbiko othunyelwa kwabakwaSARS nalowo osuke usubuya khona ukuze basheshe bakhale uma kukhona okungalungile.

Uma umuntu eqashiwe futhi intela ibanjwa ngabakwaSARS kodwa bese ethola incwadi ethi uyakweleta kufanele abuze enkampanini yakhe ukuthi kwenzeke kanjani lokho.

“Yebo siye sizwe abasebenzi bekhala ngokuthi esikhundleni sokuthola imali kwaSARS batshelwa ukuthi bayakweleta. Abantu kufanele babuze ezinkampanini zabo ukuthi kwenzeke kanjani lokho. Phela ngumqashi ohambisa incwadi eshoyo ukuthi uhola kanjani bese abakwaSARS bethatha intela yabo njalo uma uhola. Akufanele kuthiwe uyakweleta njengomsebenzi,” kusho uMkhawane.

Uthe akuzona zonke izinkinga zentela ezidinga ukuxazululwa yihhovisi labo wanxusa abantu ukuthi bakhale emahhovisi akwaSARS kuqala bese kuthi uma inkinga yabo ingaxazululwa bakhale esikhungweni sakwaSARS esibhekele izikhalo uma nakhona singaxazululwa sebengashayela umxazululi wezinkinga zentela.

“Ngaphambi kokuza kithina kumele ukhombise ukuthi ukhalile kwaSARS wababhalela izincwadi bakuziba, waya nasesikhungweni sabo esixazulula izinkinga zamakhasimende akwaSARS kodwa bakuziba waze weza kithina. Uma ungayitholanga imali okufanele ibuye kuwena ngesikhathi ebesibekiwe kufanele uzokhala kuthina. Uma kuwukuthi bekuthiwe uyakweleta wase wenza izinhlelo zokuthi ukhokhe kodwa abakwaSARS bakuziba uyeza kithina siyilungise leyo nto,” kusho uMkhawane.

Uveze ukuthi abantu bayawazi amalungelo abo entela kodwa kwesinye isikhathi bathola ukuthi abanye abantu abatshelwa ukuthi bamkweleta kanjani u-SARS.

“Abantu batshelwa ukuthi bakweleta uSARS kodwa bangatshelwa ukuthi bamkweleta uma kwenzenjani. Kufanele kube nesizathu uma ngithi uyangikweleta ngakho abantu akufanele bathule uma kuthiwa bayakweleta kumele babuze ukuthi kanjani. Uhlelo lwethu lokuxazulula izinkinga luyashesha kodwa kuya ngokuthi inkinga inkulu kangakanani. Ezinye zithatha izinsuku eziyishumi ezinye ezingu-15 kanti ezinye kuthatha izinsuku ezimbalwa” kusho uMkhawane.

Uthe ngonyaka odlule bathole izikhalo ezingu-3 000 kanti abantu bebekhala kakhulu ngokuthi imali yabo ayibuyiswa ngesikhathi esifanele kwa-SARS.

Udonse osomabhizinisi ngendlebe wathi mabagcine amarekhodi abo futhi bahambise yonke imininingwane yabo kwaSARS.

Uphethe ngokuthi akudingeki ukuthi uye kwaSARS siqu sakho kodwa ungafaka izinto zakho kwi-e-filling okuwuhlelo lokuhambisa imininingwane yakho kwaSARS nge-internet.

Ihhovisi lomxazululi wezinkinga zentela litholakala ku-www. taxombud.gov.za, 0800 662 837, 012 431 9105.

Ungababhalela ku-PO Box 12314, Hatfield 0028 noma uthumele i-e-mail ku-complaints@taxombud. gov.za