Umthetho uthi akungaqhakanjiswa inkolo eyodwa
NGESONTO eledlule iNkantolo eNkulu yaseGoli ikhiphe umyalelo othi izikole zikahulumeni akufanele ziqhakambise inkolo eyodwa ukudlula ezinye.
Lo myalelo ogcizelela okuvele kubhalwe kuMthethosisekelo nasemigomweni we-South African Schools Act ukhishwe kulandela isikhalo ebesifakwe yi-Organisation for Religious Education and Democracy, i-Ogod ebikhala ngezikole eziyisithupha izisola ngokuqhakambisa inkolo eyodwa.
Nakuba lokhu kuyinto evele ikhona kuMthethosisekelo nasemthethweni olawula izikole kuleli kodwa imvunge esuke ngesonto eledlule ikhombisile ukuthi kukhona abanganelisekile futhi abangasiqondi isinqumo senkantolo.
Indaba yenkolo yinto ebucayi futhi kufanele kucophelelwe uma kukhulunywa ngayo.
ENingizimu Afrika lapho kunezinhlanga nezinkolo eziningi futhi kunomlando wokucwasa kuyinselelo ngoba kufanele kuneliswe wonke umuntu nokuyinto okungelula ukuyenza.
Isikhathi esiningi ezindaweni eziningi kugqama inkolo yobuKhrestu njengoba futhi ngokwezibalo kuvela ukuthi amaKhrestu yiwona amaningi ezweni lethu.
Ngaphambi kokuphatha kukahulumeni wentando yabantu, ezikoleni zabantu abamnyama, kwakuvulwa ngomthandazo wenkolo yamaKhrestu futhi kuculwa namakhorasi akhona kanjalo nasezibhedlela onesi babethandaza ngaphambi kokuqala ukusebenza.
Lokhu-ke akusenzeki ezikoleni nasezibhedlela eziningi ngenxa yakho belu ukuhlonipha uMthethosisekelo.
Izikole-ke zineqhaza elibalulekile ekukhuliseni izingane njengoba zilekelelana nabazali ekwenzeni lo msebenzi nokusho ukuthi zingezinye zezindawo okufanele zisize ukufundisa abantwana ngokubaluleka kokuhloniphana nokubekezelelana ngisho izinkolo zenu zingafani.
Kube kuhle ukuthi inkantolo ikugcizelele lokhu okubhalwe kuMthethosisekelo.
Kodwa futhi izigungu ezilawula isikole kufanele zilisebenzise ilungelo lazo lokuthi zinqume okwenziwa ezikoleni zazo, uma bonke abazali nothisha esikoleni thizeni bevumelana ngokusebenzisa inqubo yenkolo ethize ngoba wonke umfundi kuleso sikole ehambisana nakho, akulona icala lelo.
UMthethosisekelo ongakufuni ukuthi kuqhakanjiswe inkolo eyodwa.