Kukhuthazwe abantu kuvulwa umbukiso
KUGQUGQUZELWE abantu ukuthi bavakashele KwaZulu-Natal kanti nabakhona kulesi sifundazwe bavakashele izindawo ezehlukene esifundazweni sabo.
Lokhu kushiwo ngesikhathi kuvulwa ngokusemthethweni i-KZN Travel and Adventure Show eDurban Exhibition Centre, ngoLwesihlanu.
Lo mbukiso unosomabhizinisi abangu-80 abakhangisa ngemikhiqizo yabo ehlukahlukene ezindaweni zabo.
Ngokwabe-Tourism KwaZulu-Natal (TKZN) umbukiso uqale ngonyaka odlule kanti baphinde bawubuyisa kulo nyaka kwiECR House and Garden Show eqale ngoLwesihlanu ezophela ngoJulayi 9.
Abakwa-TKZN bagqugquzele abantu ukuthi beze embukisweni ngoba kunemititilizo yamathikithi okuya ezindaweni ezehlukahlukene KwaZulu-Natal.
Kunomncintiswano wokuhamba ngesitimela somntakabani esizosuka eDurban Station siye e-Ballito noma eNtshongweni. “Abantu kufanele babe yizivakashi KwaZulu-Natal baye koNtshongweni bayobona amahhashi, izimakethe ezisemapulazini nempilo ehlukile kweyasedolobheni. Bangaya nasezintabeni zoKhahlamba babone ubuhle beKwaZuluNatal,” kusho abe-TKZN. Ngaphandle kweKZN Travel and Adventure Show kuneminye imibukiso kwiECR House & Garden Show. Abantu bafundiswa ukuhlobisa imizi yabo ngisho benezindlu ezincane.
Kunendawo lapho abantu befundiswa ukuzenzela izingadi zabo zemifino nokonga amanzi.
Ukungena kwi-ECR House and Garden Show kubiza u-R80 kwabadala, kube wu-60 kwabahola impesheni nabafundi kodwa kufanele baphathe umazisi.
Izingane ezineminyaka engu-12 zingena mahhala uma zihamba nomuntu omdala kanti ngoMsombuluko kuya kuLwesine kutholakala ikhofi ne-muffin mahhala njalo ngo-11 ekuseni.