Isexwayiso emakhanseleni e-IFP
I-IFP KwaZulu-Natal isikhiphe isexwayiso esishubile yasibhekisa emakhanseleni ayo yathi azokhonjwa indlela uma kutholakala ukuthi asebenzisana ne-ANC emkhandlwini.
INkatha ikhiphe lo myalezo ngemuva kokukhomba indlela uMnuz Bethuel Zitha obeyikhansela layo ku-ward 3 kuMasipala waseNdumeni.
UZitha osanda kuvulelwa amacala amabili elokushaya nokwesabisa izisebenzi zomkhandlu uxoshwe ngoba esolwa ngokuthi usebenzisana ne-ANC emkhankasweni wayo wokususa umkhandlu ezandleni ze-IFP.
I-IFP ithole ukuthi uZitha ubezovota ne-ANC esiphakamisweni sayo sokungabethembi ubuholi beMeya uMnuz Sboniso Mbatha emhlanganweni womkhandlu obuzoba ngoLwesihlanu kodwa okuthiwa ugcine ubhuntshile kulandela ukuthi amakhansela e-ANC ewuphazamisile ngoba esethole ukuthi itulo layo ngeke lisasebenza kulandela ukuxoshwa kukaZitha.
I-ANC eNdumeni inamakhansela ayisikhombisa, i-IFP inamahlanu, ukuze ikwazi ukuphatha umkhandlu ibisizwa wukudlelana kwayo ne-DA ne-EFF, i-DA inamakhansela amabili, i-EFF inelilodwa.
Ilungu le-IFP esiShayamthetho saKwaZulu-Natal, uMnuz Nhlanhla Msimanga, uthe ngeke baze bawabekezelele amakhansela abo abazothola ukuthi ahamba iqembu ngemuva.
“UZitha senza ngaye isibonelo njengoba sesimxoshile ngemuva kokuthola ukuthi usebenzisana nezimbangi zethu i-ANC etulweni lokuthatha umkhandlu,” usho kanje.
UMsimanga uthe bebevele bazi ukuthi i-ANC ibopha itulo lokuthatha iNdumeni ngemuva kokwehluleka ukunqoba eNquthu.
“Ukubhonga emswaneni nje le nto abayenzayo, uKhongolose usaphethwe yisilokozane sokuhlulwa eNquthu yingakho wenza yonke le mizamo engathi shu,” usho kanje.
UMsimanga uthe bazoya okhethweni lokuchibiyela ngemuva kokuxosha uZitha. Uthe abangabazi ukuthi bazozidlela amahlanga nasokhethweni.
Ikhansela le-ANC eMkhandlwini waseNdumeni uMnuz Lucky Khumalo liphikile ukuthi uZitha ubesebenzisana nabo ngenhloso yokuthatha umkhandlu.
“Thina sifake isiphakamiso sokuthi asisabethembi ubuholi bemeya ngoba simsola ngenkohlakalo, sacela ukuthi usomlomo abize umhlangano, ngebhadi wangaba khona umhlangano,” usho kanje.