Basola ububudengu kuLindiwe Sisulu
UMHLAZIYI wezepolitiki uSolwazi Bheki Mngomezulu usola uNgqongqoshe wezokuHlaliswa kwabantu uNksz Lindiwe Sisulu ngokuba budedengu ngenkulumo yakhe lapho ephakamise ukuthi baxoshwe ongqongqoshe okuzotholakala ukuthi banecala uma sekuphothulwe uphenyo ngezinsolo zenkohlakalo ezithinta amaemail odumo i-#GuptaLeaks.
Engxoxweni neSolezwe izolo uMngomezulu uthe kujwayelekile ukuthi uma kunenkulumo ekhona abantu basebenzise imizwa yabo. “Kujwayelekile ukuthi uma umuntu ediniwe, izinga lokucabanga lingasebenzi ngendlela efanele, asebenzise imizwa okuthi uma usumthola engasadiniwe, asho okunye,” kusho uMngomezulu. Omunye umhlaziyi wezepolitiki, uMnuz Thabani Khumalo uthe, uNksz Sisulu uyakhankasa futhi uzama ukuzibeka kahle ngale nkulumo yakhe njengoba kuyiwa engqungqutheleni kaDisemba. “Uzokhumbula ukuthi uNksz Sisulu ungomunye wabantu abasembangweni wesikhundla sikamengameli ngoDisemba, ngibona ukuthi uzama ukuzibeka endaweni ekahle ukuze abukeke kahle kulabo abangahambisani nenkohlakalo,” kusho uKhumalo.
UKhumalo uthe akacabangi ukuthi uNksz Sisulu ungumuntu ofanele ukuthi enze isitatimende salolu hlobo, wengeza ngokuthi ubona ukuthi ubezikhulumela ngokwakhe hhayi egameni le-ANC.
Amaqembu aphikisayo asephakamise ukuthi kusungulwe ikhomishini ezophenya mayelana nezinsolo ezithinta ama-email i-#GuptaLeaks.
I-ANC isiphumele obala yathi iyahambisana nokuthi kusungulwe ikhomishini ezophenya ngalama-email.