Ayikho inkululeko ezintathelini
YIZE uMengameli Jacob Zuma aqhakambisa ukuthi uyayeseka inkululeko yabezindaba nokuthi basebenze ngokukhululeka kodwa engqungqutheleni yenqubomgomo ye-ANC eqhubeka eNasrec, eGoli, kwenzeka okuhlukile.
UZuma, evula le ngqungquthela wathi uyalihlonipha ilungelo labezindaba lokusebenza ngokukhululeka kuleli.
Izintatheli zivalelwe ngaphandle zihlaliswe endaweni yazo azikwazi ukuhamba ngokukhululeka kule ngqungquthela.
Indawo lapho kubanjelwa khona imihlangano iheqwe ngocingo olude, ongakwazi ngisho ukulijomba.
Uma uzama ukukhuluma nezithunywa onogada bayakuhhewula bakusabise ngokukuphuca isigqebhezane sokungena kule ngqungquthela.
Abezindaba bapaka endaweni yabo kuthi izithunywa ezihambele le ngqungquthela zipake kwenye indawo.
Lezi zindawo ziqhelelene kakhulu njengoba ngisho abadayisi bezimpahla ze-ANC bevaleleke ngaphakathi, akulula ngisho ukubabona.
Izintatheli zingena kuphela ekuseni kakhulu kule ndawo uma kunezidlo zasekuseni ezihlelwe yinhlangano yosomabhizinisi.
Ngemuva kokuphothulwa kwalezi zidlo izintatheli ziyakhishwa ziye endaweni yazo.
Izolo kuthathe cishe imizuzu engu-30 onogada bala ukhasha bengafuni izintatheli zingene njengoba bezizobona iPhini likaMengameli uMnuz Cyril Ramaphosa ehambela lapho kudayiswa khona ekhuluma nabantu ngezinto abazidayisayo.
Okhulumela i-ANC, uMnuz Zizi Kodwa, ebuzwa ngalokhu umane wakuchitha wathi bayazivumela izintatheli ukuthi zingene.
“Siyabavumela abashaya izithombe ukuthi bangene bashuthe, sizokwenza nakusasa (namhlanje),” kusho uKodwa.