UMbalula uxwayisa abamashela izintatheli

UNGQONGQOSHE wezamaPhoyisa, uMnuz Fikile Mbalula, usexwayise labo abazomashela emizini yabaholi noma yezintatheli ukuthi bazobaphonsa esikiti ngoba wonke umuntu unelungelo lokusho noma yini.

UMbalula uthe noma kungathiwa umuntu awuvumelani naye asikho isidingo sokuthi umashele emzini wakhe.

“Labo abamashela ezindlini zezintatheli, abamashela emzini kaSolly Mapaila (iPhini likaNobhala we-SACP) sizobabopha. Ngeke sihlonize ngokubathathela izinyathelo ngoba noma kungathiwa umuntu awuzwani naye asikho isidigo sokuthi umashele izingane zakhe,” kusho uMbalula.

Ukusho lokhu ekhuluma nezintatheli engqungqutheleni eqhubekayo yenqubomgomo ye-ANC eNasrec, eGoli izolo.

Ukusho lokhu emuva kokumashela kwamalungu eBlack First Land First (BLF) eholwa nguMnuz Andile Mngxitama emashele emzini woqweqwe lwentatheli, uMnuz Peter Bruce bekhala ngokubhala kabi kwakhe ngomndeni wakwaGupta.

Amanye amalungu e-ANC kuthiwa amashela emzini kaMapaila ngoba ekhala ngokuthi uhlale egxeka uMengameli Jacob Zuma.

UMbalula uthe izwe libuswa ngomthetho ngakho akekho umuntu okumele aphile ngokusaba ngenxa yokuthi uzomashelwa.

IBLF kuthiwa inohlu lwezintatheli ezozimashela ikhala ngokuthi zibhala kabi ngalo mndeni.

Uthe kumanje bamatasa babheka abantu abachoma ngezinto ku-instagram ukuthi bazithathaphi.

“Abanye babo bacebe nje ngoba beyizigebengu. Amaphoyisa kumanje abheka bonke labo abachoma ngomnotho wabo kule nkundla. Abanye siyathola ukuthi banamathenda, abanye bayizigebengu yingakho kumele abantu baqaphele izinto abazifaka kulezi zinkundla zokuxhumana ngoba bangazibona sebeboshwa.”