‘Kuncike kuMcCarthy ngoModise neCity’
KONKE kulele kuBennie McCarthy ngoTeko Modise omataniswa neCape Town City. Lokhu kuvele ngesikhathi Isolezwe lixoxa noJohn Comitis ongusihlalo waleli qembu laseKapa.
ICity isizakhele igama ngokulanda abadlali abanohlonze. Isanda kusayinisa u-Ayanda Patosi obegijima phesheya. NgoJanuwari ibixoxa ngokusayinisa uMichael Essien owaduma kwiChelsea naseqenjini lesizwe laseNigeria.
UModise usanda kuhlukana neMamelodi Sundowns. Ngemuva kwalokho imenenja yakhe uJazzman Mahlakgane ikubeke kwacaca ukuthi akazimisele ngokuyeka ibhola usafuna ukudlala eminye iminyaka emibili.
UComitis ebuzwa ukuthi ziyiqiniso kangakanani izindaba zokuthi bafuna ukusayinisa uModise uthe konke kuncike kuMcCarthy.
“Mina njengosihlalo weqembu sengiqedile ukusayinisa abadlali. Abadlali abazosayiniswa yiqembu ngabadlali abafunwa ngumqeqeshi. UBennie baningi abadlali angakaze asebenze nabo ngakho usafuna ukuzinika amasonto amabili nabo ngemuva kwalokho uzobe eseyasitshela ukuthi ufuna ukusayinisa baphi abadlali. Uma ethi ufuna ukusayinisa uTeko Modise sizomeseka ngokumtholela yena. Okwamanje ubengakaze akhulume ngaye,” kusho uComitis.
Izolo uMahlakgane akazange atholakale ucingo lwakhe beluvaliwe. UModise uke wasebenza noMcCarthy kwiBafana Bafana. ICity izobe idlala kwiCaf Confederation Cup ngesizini ezayo emva kokuqeda endaweni yesithathu kwi-log ye-Absa Premiership.“Uma sisayinisa ngeke senze izinguquko eziningi. Nathi ngeke sidedele abadlali abaningi. Asifuni ukuhlakaza umgqigqo omuhle weqembu. Amaqembu afuna u-Aubrey Ngoma noLebogang Manyama akakhohlwe ngoba ngizobadayisa uma kuneqembu laphesheya elibafunayo,” kusho uComitis.
Kubadlali abasize iqembu lawina iTelkom Knockout laqeda endaweni yesithathu kwi-log nguBhongolwethu Jayiya kuphela oshiyayo kwiCity. Inkontileka abenayo ayizange ivuselelwe njengoba ibiphela ngoJuni 30.
USiyanda “Magazi” Xulu ukhonjwa kwiCity njengoba esezinhlelweni zokunqamula inkontileka yakhe neChiefs kulandela ukufakwa ohlwini lwabadlali abangekho ezinhlelweni zomqeqeshi uSteve Komphela.
Ngempelasonto uMcCarthy uqalile emsebenzini wakhe wokupheka iqembu asayine kulona inkontileka yeminyaka emithathu ethatha ku-Eric Tinkler osekwiSuperSport United.