AmaProteas azolwela eyokukleliswa nge-England
AMA-PROTEAS abheke umgqigqo omuhle emidlalweni emine yochungechunge lwama-Test azoyidlala ne-England ekuhambeni.
Iqembu laseNingizimu Afrika likhale ngaphansi ochungechungeni lwemidlalo yeT20 neyosuku. Njengamanje isizodlala ne-England emidlalweni emine yama-Test. Umdlalo wokuqala use-The Lord’s ngoLwesine.
ULinda Zondi oyinhloko yethimba labaqoki utshele Isolezwe ukuthi bafuna ukuqhubeka nomgqigqo wabo omuhle emidlalweni yama-Test.
“Iqembu lethu lama-Test lenza kahle kulezi zinsuku. Isifiso sethu wukuhlala endaweni yokuqala ekuklelisweni kwamazwe emidlalweni yama-Test. Lokhu kumele sikwenze ngokuthi sishaye amaqembu afana ne-England,” kusho uZondi.
AmaProteas asefomini emidlalweni yama-Test. Aqumbe phansi iNew Zealand ngo-1-0 ekuhambeni, athela othulini i-Australia ngo-2-1, avithiza iSri Lanka ngo-3-0 abhabhadisa namaBlack Caps ngo-1-0 ochungechungeni lwemidlo emibili eNingizimu Afrika.
AmaProteas agcina ukushaywa ngoJanuwari 2016 equnjwa iyona e-England ekhaya.
“Siyazi ukuthi ngeke kube lula ukukhipha i-England esibayeni sayo kodwa uma senza kahle izinto ezilula sase sinqobe imizuzu emqoka emidlalweni nakanjani sizophumelela,” kusho uZondi.
UHienho Kuhn kulindeleke ukuthi avule noDean Elgar. UStephen Cook obevula no-Elgar ushaywe ngesithende esikwatini esiyodlala e-England. Lokhu kulandela ukushaya udaka eNew Zealand ekuqaleni konyaka.
INingizimu Afrika sekuphele iminyaka emibili izama ukuvala isikhala sika-Alviro Petersen owathatha umhlalaphansi emidlalweni yamazwe. Sekuzanywe abadlali abaningi kule ndawo.
AmaProteas ahlezi endaweni yesibili ekuklelisweni kwamazwe emidlalweni yama-Test. I-England abadlala nayo iyibambe endaweni yesine. I-India iyona ehlezi endaweni yokuqala. Khona manjalo iqembu lesizwe lakuleli labesifazane lizibeke endaweni enhle yokufinyelela kuma-semi final eNdebe yoMhlaba kulandela ukuthela othulini iWest Indies ngamawikethi ayishumi emdlalweni wesithathu wamaqoqo.
Elakuleli liyikhiphe yonke iWest Indies isiyenze ama-run angu-48 kuma-over angu-26. Izintokazi zakuleli kuzithathe ama-over ayisikhombisa ukufica lesi sibalo sama-run. NgoJulayi 5 elakuleli lizodlala ne-England bese kuthi ngoJulayi 8 lidlale ne-India, lilandele neSri Lanka ngoJulayi 12 bese livala eyamaqoqo ne-Australia ngoJulayi 15.