Ubengakulindele ukuqokwa kwakhe
USHAQEKILE ngokuqokwa kwakhe kumaSimon “Mabhunu” Sabela Film and Television Awards umlingisi osemncane ozakhele udumo kuZalo, uLondeka Mlaba.
ULondeka (25) uzakhele ugazi kubantu ngokudlala indawo kaSbahle kuZalo olukhonjiswa ngo-8.30 ebusuku phakathi nesonto kuSABC 1.
UZalo yiwona mdlalo wokuqala abonakale kuwo kuthelevishini.
Intokazi yasePhoenix, eThekwini, iqokwe emunxeni weBest Newcomer lapho iqhathwe khona noLinda Mtoba odlala indawo kaZama Ngwenya kwiSibaya.
“Kuyajabulisa ukuqokwa. Bengingalindele ngoba angigxilile emiklomelweni. Ngisemusha, bengizitshela ukuthi imiklomelo ngizoyibona mhlawumbe ngemuva kweminyaka embalwa ngisebenza,” kusho uLondeka.
Njengamanje akabonakali kuZalo futhi akaqophi. “NgiseGoli manje kukhona okunye engiphezu kwako engingeke ngikudalule okwamanje. Ngicabanga ukuthi kuzovela ngo-Agasti futhi kuthinta ithelevishini,” kusho yena. Uthe isizathu esimenze wathuthela eGoli yingoba awamaningi amathuba akhona eThekwini ngenxa yokuthi umdlalo okhona wuZalo kuphela. Akafunanga ukuphumela obala ngokuthi njengoba engasabonakali kuZalo yingoba eseshiyile unomphelo.
“KuZalo bakufonela noma yinini uma sebekudinga. Kodwa-ke angihleli kumele ngilokhu nginyakaza,” kusho uLondeka.
Uthe udlala nemidlalo yeshashalazi eGoli.
KumaSimon Mabhunu Sabela Awards kuzoqokwa abalingisi baKwaZulu-Natal. Abaqokwe kakhulu ngabalingisi bemidlalo edlala ngesikhathi esifanayo kuthelevishini Uzalo neSibaya. Kubalingisi bale midlalo abaqokiwe kukhona kubo uLeleti Khumalo (Uzalo), Nomzamo Mbatha (Isibaya), Dawn Thandeka King (Uzalo), Thembi Nyandeni (Isibaya) noCebile Mlaba (Alliance) emunxeni weBest Female Actress. Abanye abaqokiwe kukhona kubo u-Abdul Khoza (Isibaya), Gugu Gumede (Uzalo), Gcina Mkhize (Isibaya), Menzi Ngubane (Isibaya) nabanye abaningi. Abanqobile bazomenyezelwa emcimbini ozoba sePlayhouse ngoJulayi 15.