Isiphakamiso silethe ithemba lobumbano
KULOKOZA inhlansi yethemba ngobumbano kwi-ANC ngenxa yesiphakamiso sikaSihlalo we-ANC KwaZulu-Natal, uMnuz Sihle Zikalala, sokuthi ozohlulwa embangweni wokuba ngumengameli wenhlangano ngoDisemba kumele abe yiPhini likaMengameli.
Isiphakamiso kuthiwa sesekwa ngisho nawuMengameli Jacob Zuma okuthiwa uke wakhuluma ngaso kwamanye amakhomishini engqungqutheleni.
Ngempelasonto uZikalala uphakamise ukuthi ukuze kube nobumbano bazoyifaka ixoxwe eyokuthi lowo ozokhala ngaphansi kumele abe yiphini.
Izolo uNobhala we-ANC e-Eastern Cape, uMnuz Oscar Mabuyane, uthe bayaseseka isiphakamiso ngoba sizobumba i-ANC.
“EKZN yinto asebeyenze cishe izikhawu ezintathu futhi iphumelele. Lokhu bekuyibumba i-ANC kungabi nokuhlukana noma abazoshiya phansi iqembu baye kwamanye amaqembu.”
UNobhala jikelele we-ANC, uMnuz Gwede Mantashe, uzwakalise ukukhathazeka ngokuthi i-ANC iyafa ngenxa yokuhlukana.
Uthe ngesikhathi kuhlulwa olunye uhlangothi engqungqutheleni yasePolokwane kwaphuma abaholi abaphezulu bayokwakha iCope.
Ubuye wakhala ngokuthi ngemuva kokuxoshwa kowayenguMengameli wophiko lwentsha, uMnuz Julius Malema, wahamba wayovula i-EFF.
“I-ANC iyancuzeka kancane kancane, yingakho kudingeka ibumbane. Sikhathazekile ngokuthi njalo uma kuzoba nengqungquthela kukhona uhlangothi oluxebukayo luhambe nenqwaba yabantu,” kusho uMantashe ekhuluma nabezindaba ngempelasonto.
UMabuyane uthe udaba lokuthi ohlulwayo kumele abe yiphini bazoluxoxa namhlanje uma sekuhlangene wonke amalungu ngoba izolo bebekumakhomishini ehlukene.
UNobhala we-ANC esifundeni esikhulu iTheku, uMnuz Bheki Ntuli, uthe yisiphakamiso esihle lesi ngoba sizonqanda ukwehlukana.
Uthe yize beyisifundazwe esikhulu se-ANC kodwa ngeke baqhoshe ngalokho ngoba badinga ukusebenzisana nezinye izifundazwe.
“Sinamalungu angu-508 kule ngqungquthela kodwa asikwazi ukuthi singaqhosha ngalokho sikhukhumale ngakho. Yingakho kumele sixoxe nezinye izifundazwe. Sizosiphusha isiphakamiso ngoba cishe izikhawu ezimbili e-KZN kuwina uNdebele (Sbu) uMkhize (Zweli) wakhala ngaphansi kodwa waba yiPhini likaNdebele,” kusho uNtuli.
Uthe uma siphumelela sizobumba inhlangano.
UMengameli we-ANC Youth League, uMnuz Collen Maine, uthe ngeke siphase.
Umhlaziyi wezepolitiki, uMnuz Lukhona Mnguni, waseNyuvesi yaKwaZulu-Natal, uthe i-ANC kudingeka ibumbane uma ifuna ukuqhubeka ibuse. Uthe ziningi izinto ezingenzeka engqungqutheleni yangoDismeba njengokuthi uma kukhona uhlangothi olukhala ngaphansi ekuholeni i-ANC lungagcina seluhlubuka.
“Le ngqungquthela ayithathi izinqumo kodwa eyangoDisemba ethatha izinqumo. Kungakhulunywa nje kuvunyelwane manje kodwa umanqoba wuDisemba.”
Khonamanjalo, uZuma uncome amalungu enhlangano, awentsha kanye nomakadebona ngokuzinikela kwingqungquthela.
Uthe abaholi abaphezulu be-ANC bakhuluma ngazwi linye engqungqutheleni.
Ukusho lokhu ngesikhathi ehamba ebuka imibukiso nemifuziselo yabaholi benhlangano okubalwa kuyo nalowo woMnuz Oliver Tambo noMnuz Nelson Mandela.
“Ngiyajabula ukubona ukuzinikela kwamalungu kule ngqungquthela. Intsha, omakadebona ngabanye babantu abaphawula into enesigqi,” kusho uZuma.
Uthe ingqungquthela ihamba kahle wathi iziphakamiso zayo zizokwethulwa engqungqutheleni kaDisemba.