Unyatheleke washona owebandla lamaNazaretha
LIGUBUZELWE yifu elimnyama ibandla lamaNazaretha eBuhleni ngemuva kwesehlakalo sokushona kowesifazane onyatheleke washona ngesikhathi kusuka isibhudubhudu ngoMgqibelo.
Ibandla kuthiwa belinenkonzo ebizwa ngomdedele lilungiselela ukuqala uhambo oluya entabeni ngesikhathi kwehla lo mshophi.
Ngokuthola kweSolezwe ngemithombo yalo engaphakathi eBuhleni babili abantu abashonile kodwa amaphoyisa aqinisekise ngokushona koyedwa.
Okhulumela amaphoyisa KwaZulu-Natal, uLt Colonel Thulani Zwane, uthe kuyaphenywa ngokutholakala kwesidumbu sowesifazane.
“Besisathole ukuthi munye owesifazane odlulile emhlabeni. Alikho elinye igama noma isigameko esivelile esithinta omunye umuntu,” kuchaza uZwane.
UNksz Cynthia Phuzi (45) kuthiwa ushone ngesikhathi egxotshwa amanye amalungu ebandla angomama ngesikhathi sekungena bona eBuhleni.
Kuthintwa okhulumela ibandla laseBuhleni, uMnuz Thokozani Mncwabe, uthe beyibandla bebengakezwa ngalesi sehlakalo.
“Ngiyile esontweni ngeSabatha ngangenisa umdedele ngaphinde ngahamba,” kusho uMncwabe. Uthe asikho isitatimende esivela ebandleni asitholile mayelana nokushona kwelungu lebandla.
Umthombo ongaphakathi ebandleni uveze ukuthi uma kungena umdedele kungenwa izikhawu ezehlukene akungenwa kanye kanye. Umdedele yinkonzo yokungenisa abantu abangasekho. “Omama baningi kakhulu, uma bengena bayaphushana, kungcono uma kungena amakhosazana nobaba ngoba isiminyaminya sisuke sisincane. Lesi sehlakalo sehle sekuntambama kwathuka abantu abaningi,” kusho umthombo.
Uthe babili abesifazane abashone kulesi sehlakalo ngoMgqibelo.
Omunye umthombo uthe uzwile ngalolu daba oluthuse abantu abaningi.
“Mina ngizwe kuthiwa babili abantu abashone kwenzeka lesi sehlakalo. Akukho okubambekayo engingathi kwenzekile kodwa ngenxa yokududulana abanye bagcina bewela phansi bese beyagxobeka bangakwazi ukusukuma,” kuchaza umthombo.
Uthe minyaka yonke uma kuzonyukwa kuyiwe entabeni zijwayele ukwenzeka izigameko ezifana nalesi.