Uyavutha ummeli ka-Oupa Manyisa
UMMELI kakaputeni we-Orlando Pirates u-Oupa “Ace” Manyisa usonga ngokuyithathela izinyathelo zomthetho intokazi engu-DJ, uThato Makgaka, uma iqhubeka nokusabalalisa izindaba zokuthi ingunina wengane kaManyisa.
UJohn Wilson ongummeli kaManyisa utshele Isolezwe ukuthi bazomthathela izinyathelo uThato ngoba imiphumela yolibofuzo ikubeke kwacaca ukuthi uManyisa akasiye uyise wengane.
NgeSonto uManyisa ufake imiphumela yolibofuzo enkundleni yokuxhumana i-Instagram. Imiphumela ibithi uManyisa akasiye uyise ka-Oupa Junior okuyigama ingane eqanjwe ngalo. Ingane yazalwa ngo-2015.
Le ntokazi kulindeleke ukuthi ivele ohlelweni lweMzansi Magic, iDiski Divas eqala ngoJulayi 12. Uhlelo luveza izintokazi ezishade nabadlali bebhola, ezithandana nabo noma esezahlukana nabo.
“UManyisa uphoqelekile ukuthi imiphumela yolibofuzo ayifake ezinkundleni zokuxhumana ngoba indaba bese imphazamise iminyaka emibili. Bese ekhathele wukuhlukunyezwa yile ntokazi. Indaba yokuthi unengane nayo iphazamise umndeni wakhe. Uma le ntokazi iqhubeka nokusabalalisa izindaba ezingekho phezu kolibofuzo sizoyithathela izinyathelo zomthetho. Ayikwazi ukuhlambalaza isikhasimende lami kanjalo nje. Iyazi ukuthi sinesivumelwano okungamele sidalulwe emphakathini ngalolu daba,” kusho uWilson.
Isitatimende esithunyelwe abeMzansi Magic asivezi ukuthi uThato uzobe evele ngamuphi umdlali ohlelweni kodwa imibiko yamaphephandaba angempelasonto ibithi uqokwe ngokuba unina wengane kaManyisa.
“Uma le ntokazi izovela ngegama likaManyisa ohlelweni lwethelevishini lokho kuzoba yinkinga. Kuzophoqa ukuthi sithathe izinyathelo zomthetho. Mayelana nokuthi sizothathela bani phakathi kwentombazane nabaphathi bohlelo ngicabanga ukuthi lokho sekuyomele sikufakele izibuko,” kusho uWilson.
Uthe lesi silomo seBhakabhaka asikaze siyondle ingane selokhu yazalwa ngo-2015.
“Wakubeka kwacaca ukuthi akusiyona eyakhe. Ukube ubeyondla ubezobe evuma ukuthi ngeyakhe,” kusho uWilson. Uthe abazimisele ngokuphinda benze okunye ukuhlolwa kolibofuzo njengoba phambilini kuke kwavela ukuthi uThato akahambisani nemiphumela ekhona.
UNondumiso Mabece weMzansi Magic uthe abesifazane abasuke bebonakala ohlelweni abake bathandana noma bashada nabadlali bebhola eminyakeni edlule noma abasathandana nabo.
“UThato ukhethwe ngoba wake wathandana nomdlali webhola hhayi ngengane ekhona,” kuchaza uNondumiso. Uthe imiphumela yolibofuzo ayinamthelela ekubeni yingxenye yohlelo.
UThato kubonakale zingamphazamisanga izindaba zikaManyisa zokufaka imiphumela yolibofuzo ku-Instagram. Le ntokazi ivele yafaka isithombe sayo nazo zonke izintokazi ezizobonakala kulolu hlelo yabhala ukuthi “Okusalayo Indaba Ila”.