Sebengu-11 ababoshwe emicimbini yeVDJ
SIYANDA isibalo sababoshwe emicimbini ehambisana neVodacom Durban July (VDJ) ngoMgqibelo njengoba sesifinyelele kwabangu-11.
Izolo Isolezwe libike ukuthi bayisishiyagalombili ababoshelwe izinsolo zokukhuthuza izicukuthwane ebezisematendeni enkundleni yomjaho eGreyville.
Sekuvele ukuthi kubuye kwaboshwa abathathu ebusuku emcimbini iFact Durban Rocks obusePeople’s Park eMoses Mabhida abasolwa ngokweba amaselula.
UCaptain Khephu Ndlovu, okhulumela amaphoyisa aseThekwini, uthe kunamaselula angu-14 atholakele okumele abanikazi bawo bawalande esiteshini eDurban Central.
“Kunabanye abese bevele bewavulile amacala okulahlekelwa amaselula abanye bebengakawavuli. Angu-14 amaselula angakalandwa esiteshini esicela ukuthi abanikazi bawo bawalande. Abantu basuke sebejabule kakhulu kule micimbini baze banganaki. Abanye baba budedengu nangezinto abaziphethe okwenza kube lula nokuthi zilahleke,” kuchaza uNdlovu.
Uthe ukuboshwa kwabasolwa abangaka kule micimbi kuveza ngokusobala ukuthi amaphoyisa abephume ngobuningi ukuqapha isimo.
Uveze ukuthi amaphoyisa asebenze kanzima ukuqinisa ezokuphepha kwiVDJ.
UNdlovu uthe amaselula atholakele awohlobo olubizayo futhi kungenzeka ukuthi abanye abanikazi bawo akubona abakulesi sifundazwe ngoba lo mcimbi uletha nezivakashi. Abasolwa abathathu bazovela enkantolo maduzane. Abayisishiyagalombili ababoshwe ematendeni eGreyville basolwa ngamacala okukhwabanisa, ukubamba inkunzi nokutholakala nempahla eyebiwe. UCapt Nqobile Gwala okhulumela amaphoyisa KwaZulu-Natal, uthe abathathu baboshwe ngaphakathi eGreyville kwathi abayisihlanu baboshwa emigwaqweni ezungeze le nkundla yomjaho. Bekulindeleke ukuthi izolo babingelele imantshi eThekwini, okushaye isikhathi sokuloba ingakatholakali imininingwane yayo.
Abafuna ukuzobheka amaselula abalahlekele eMoses Mabhida bangaxhumana noCaptain LM Cescutti enombolweni ethi 031 325 4271 noma baziyele mathupha esiteshini samaphoyisa eDurban Central.