Kugxekwa abasabalalisa imibiko yokwehliswa kwemaki lokuphasa
UMNYANGO weMfundo eyisiSekelo usugxeke abasabalalisa imibiko ethi uzokwehlisa imaki lokuphasa ezikoleni.
Imibiko ithi umnyango uzokwehlisa imaki lokuphasa kwaGrade 10 no-11 ezifundweni ezithile okubalwa kuzo nezilimi.
Kuthiwa uhlela ukwehlisa izinga lokuphasa ulimi liye ku-40% lisuka ku-50%, iMaths isuke ku-40% iye ku-30%, bese kuthi ukuphasa zonke izifundo kube wu-40%.
Okhulumela umnyango, uMnuz Elijah Mhlanga, uthe iqiniso wukuthi ngo-2015 bakhipha isekhula unombolo 3, owawuzoqala ukusebenza ngonyaka odlule lapho kwakugcizelela khona ukuthi iMaths kumele iphaswe ngo-40% kodwa umfundi angadudulwa uma ephase zonke izifundo zakhe kodwa wathola iMaths ngo-20%.
Uthe basayibhunga eyokuthi njengoba kungumqansa ukuphasa iMaths ngo-40% nezilimi ngo-50% bachibiyele eminye yemigomo ukuze kubhekelelwe labo bafundi abangakwazi ukwenza kahle.
“Sizoxoxa nazo zonke izinhlaka okubalwa kuzo izinyunyana, abasetha izivivinyo, izikhungo zemfundo, abazali, umphakathi, amalungu esigungu esengamele izikole ngodaba lokuchibiyela izinto ezithinta ukuphasa kwabafundi. Iziphakamiso ezikhona wukuthi kumele izifundo ezine ziphaswe ngo-40%, esinye sazo kube ulimi owaluncela ebeleni,” kusho uMhlanga
Uthe kumele umfundi aphase ezinye izifundo ezintathu ngo30% bese kususwe umbandela obekiwe wokuthi iMaths kumele iphaswe ngaliphi imaki.
“Okwamanje yinto esaxoxwa, akukho sinqumo esisathathiwe ngodaba lokwehlisa imaki lokuphasa. Lezi ziphakamiso okuxoxwa ngazo zithinta neFurther Education and Training Phase (FET okuwuGrade 10 kuya kwamatric).”
Uthe uma sekuvunyelwene kwaphinde kwaphasiswa kuyobe sekuthunyelwa ezinhlakeni ezifanele. Okwamanje yinto yangaphakathi okusabhungwa ngayo akukho sinqumo esisathathiwe.