Intukuthelo kuhlehla icala
BAPHUME behluthukile izolo bedinwa ukuhlehla kwecala, abemindeni ethinteka kwelomfelokazi waKwaNdengezi osolwa ngokubulala umyeni wakhe.
UNkk Ethel Nkosingiphile Ngubane (51) osolwa ngokubulala uMnuz Sbusiso Ngubane (52) obengusomabhizinisi, izolo ubevele eNkantolo yeMantshi ePinetown. Ubevele noMnuz Ntobeko Dube asolwa naye ecaleni lokubulala umyeni wakhe ngoMeyi nonyaka. Bekuvele noNksz Nonhlanhla Mambani owaboshwa ngonyaka odlule noNkk Ngubane ngezinsolo zokwakha itulo lokubulala uNgubane, ababuye bampimpwa yizinkabi okusolwa ukuthi zazithunywe ukubulala.
Izolo bekulindeleke ukuthi kuphume isinqumo sebheyili kaNkk Ngubane noDube kodwa icala lahlehlela uMsombuluko ozayo. Inkantolo ithe icala lihlehle ngoba ummeli kaDube obizwe ngoMhlongo, ubengekho enkantolo. Kuthiwa uMhlongo usanda kushonelwa ngumfowabo okumphoqe ukuthi aphuthume ekhaya.
Bahluthuka nje abemindeni yingoba bese belinde isikhathi eside icala lingangeni. Ligcine ukuqulwa ngesonto eledlule batshelwa ukuthi bafike ngo-11.30 izolo kodwa icala lize langena sekubuywa ekhefini lesidlo sasemini. Lingakaqali icala amadodakazi kaNkk Ngubane abehleli emabhentshini nodadewabo kamsolwa, abelokhu enesiqiniseko sokuthi uzoyithola ibheyili izolo. Ngesikhathi lihlehla icala awapholisanga maseko aphuma enkantolo ejabhile aqonda lapho epake khona imoto. Bekukhona nomndeni kaDube nawo ophume enkantolo uphoxekile ngokuhlehla kwecala.
Ezinye izihlobo zikaNkk Ngubane okubalwa nodadewabo, bezikhala ngokugqigqela ubala enkantolo.
Abanye bakhale ngokuthi kuzoze kuphele imali kaphethroli. Kuphawuleke nokungahoshelani emndenini kamsolwa nomufi njengoba bekunezinkulumo emaphaseji enkantolo. Udadewabo kanina kamufi utshele udadewabo kaNkk Ngubane ukuthi yena ngeke ayeke ukuza enkantolo. “Asikho isidingo sokuzondana ngoba nami ngiphelezela udadewethu oshonelwe indodana yakhe. Kuyicala yini lokho ngoba nawe uphelezele udadewenu njengoba ulana enkantolo,” kusho yena.
Lingakaqali icala ekuseni amalungu omphakathi ayidlanzana abebhikisha ngaphesheya kwenkantolo efuna ukuthi abasolwa bangayitholi ibheyili. Kubonakale sengathi usuyehla umfutho kubabhikishi njengoba inkantolo isibayalele ukuthi bangasondeli enkantolo njengoba babenza besaqala.
UNkk Ngubane waboshwa ngoMeyi engaphandle kwebheyili ngecala lokuzama itulo lokubulala umyeni wakhe. UNgubane wabulawa esitolo sakhe KwaNdengezi. Bese kuphele iminyaka emithathu bengezwani nomkakhe.