UZuma uzibangela ukugxekwa
UMENGAMELI Jacob Zuma nguyena oziqhatha nokugxekwa ngesenzo sakhe sokuhlasela omakadebona be-ANC ngesikhathi evula ingqungquthela yemigomo yeqembu eNasrec, eGoli.
Lona ngumbono womhlaziyi wezepolitiki ozimele KwaZuluNatal, uMnuz Thabani Khumalo, ngemuva kokuthi abaholi abathathu be-ANC – uMnuz Enoch Godongwana, oyilungu lesigungu esiphezulu, uSotshwebhu we-ANC ePhalamende, uMnuz Jackson Mthembu noSihlalo kaKhongolose eGoli, uMnuz Paul Mashatile – bephumele obala bahlasela uZuma. Bakwenze lokhu ngemuva kokuthi umengameli egxeke omakadebona.
“Uma ukhumbula kahle inkulumo kaMengameli iqale kahle ngesikhathi evula ingqungquthela yemigomo kwangathi ufuna ukufaka umoya wobumbano engqungqutheleni kodwa kuthe eseya ngasemaphethelweni waqala wagxeka omakadebona, okuyinto engicabanga ukuthi ushaye isikhala ngokuyenza,” kusho uKhumalo.
Omunye umhlaziyi wezepolitiki ozimele, uMnuz Aubrey Matshiqi, uthe akwethusi ukuzwa abaholi begxeka uZuma, wengeza ngokuthi lokhu kukhombisa ukuthi lujule kangakanani uqhekeko kwi-ANC.
UMatshiqi uthe labaholi phambilini sebeke baphumela obala bakhombisa ukukhathazeka ngobuholi bukaMengameli.
“Uma ubheka izinto ezishiwo nguMthembu, uGodongwana noMashatile kazihambisani nalezo zalabo abahambisana noZuma. Konke lokhu okwenzekayo kukhombisa ukuthi inhlangano ihlukene phakathi,” kusho uMatshiqi.
Omunye umhlaziyi wezepolitiki ozimele, uMnuz Protas Madlala, naye uhambe emazwini kaMatshiqi wathi laba baholi kade bakhombisa ukuthi abamthandi uZuma.
UMadlala uthe abaholi kababona ongcetheza yingakho bengasabi ukugxeka uMengameli.
“Le nto akumele isethuse ngoba akekho ongazi ukuthi i-ANC imaqembuqembu ngaphakathi,” kusho uMadlala.