Isiphakamiso sophenyo ngokubiza kwe-data
NJENGOBA kuhlale kukhalwa ngokubiza kwe-data, uNgqongqoshe wezokuThuthukiswa koMnotho uMnuz Ebrahim Patel uthe ikhomishini yezokuncintisana kumele iphenye ngokumba eqolo kwe-data.
Ukusho lokhu izolo ekuseni esidlweni se-ANC eNasrec eGoli njengoba kunengqungquthela yenqubomgomo yale nhlangano.
“Kuyadingeka ukuthi kuphenywe ngokubiza kwe-data.Uma kungenziwa uphenyo kungavundululwa izinto eziningi ezingahambi kahle,” kusho uPatel.
Uthe kumanje bayayibheka eyokuchibiyela umthetho wale khomishini ukuze kuhlakazwe labo abahlanganayo banyuse imali abayibizayo.
Uqhube wathi lokhu bakwenza ngokufaka isichibiyelo kwiKhabhinethi ngoba lesi sikhungo sokuncintisana sibalulekile.
Ubalule nendaba yokuthi izwe kumele lilwe nenkohlakalo ikakhulu njengoba kunezinsolo zokuthi kukhona ababambe umbuso ngobhongwane.
“Kumele isheshiswe eyokuphenywa kwalezi zinsolo ukuze kunyuke umnotho wakuleli obhekene nezinkinga. Lokhu kuzokwenza ukuthi umphakathi ubuyelwe yithemba,” kusho uPatel.
NoMengameli Jacob Zuma wathi kumele luqalwe ngokushesha uphenyo oluthinta ababambe umbuso ngobhongwane.
“Umnotho wethu usenkingeni kusengenzeka futhi uphinde wehle. Yingakho kubalulekile ukuthi kubuye ukuzethemba kwezwe njengoba kunabantu abasha ababuza ngamathuba akhona,” kusho uPatel.
Uthe kumele kube nohlaka oluzobunjwa oluzobhekana nendaba yokunyusa umnotho, kwakhiwe amathuba emisebenzi, kunikwe abantu abasha amathuba kuliwe nenkohlakalo.
“Izinkampani ezingaphansi kukahulumeni kumele zisebenze ngendlela. Kudingeka kube nokusebenzisana phakathi kukahulumeni nomkhakha ozimele ukuze kuthuthukiswe umphakathi.”
Uthe abasebenzi nezinyunyana zabo akumele bashiywe ngaphandle kulokhu ngoba yibona bantu abafukula imindeni yabo baphinde bakhokhe nentela.