Bakhale kwebhekele ukuncintisana okuhle
UMENGAMELI weKwaZuluNatal Youth Chamber of Commerce and Industry (KYCCI), uMnuz William Jezile, uthe izinxanxathela zezitolo ezivulwa emalokishini zibulala osomabhizinisi abamnyama ngoba akuncintiswana kahle.
UJezile usho kanje embuthanweni wenhlangano ebhekele ukuncintisana okuhle phakathi kwamabhizinisi eNingizimu Afrika, iCompetition Commission, oseNkosi Albert Luthuli International Convention Centre (ICC), eThekwini.
“Ukuza kwezinxanxathela zezitolo emalokishini kusho ukuthi kuvalwa amabhizinisi aselokishini afana namasuphamakethe, izipaza namabhusha. Phela izinxanxathela zinempahla ebiza kancane uma iqhathaniswa neyase-spaza,” kusho uJezile.
Uthe osomabhizinisi baselokishini abakwazi ukuncintisana nezinxanxathela zezitolo ngoba abakwazi nokurenta ngoba irenti imba eqolo.
Uphinde waveza ukuthi ngenxa yokuthi osomabhizinisi basemalokishini abakwazi ukuncintisana nezitolo ezinkulu ezisezinxanxatheleni zezitolo futhi nezipaza zabo ziyavalwa, kugcina sekufike abokufika basebenzise izipaza.
“Abokufika yibona abasebenzisa izipaza emalokishini manje futhi impahla yabo ayibizi. Siyazi ukuthi baxhaswa ngamaNdiya futhi sinabo ubufakazi bezitolo ezibanikeza impahla. Sizozibhala phansi izitolo ezidayisela abokufika,” kusho uJezile.
Uthe akusikho ukuthi bathi abazifuni izinxanxathela zezitolo elokishini kodwa bafuna uma ifika abantu bendawo babe namasheya kuyo, kube nohlelo lokuqasha abantu baselokishini futhi kusungulwe nesikhwama esizofundisa izingane zaselokishini.
Ummeli weCompetition Commission uNkk Lulama Mtanga ucele uJezile ukuthi ababhalele izitolo ezidayisela abokufika impahla ngamanani aphansi aphinde eze nezixazululo ngokwakhiwa kwezinxanxathela zezitolo emalokishini.
UMnuz Vusi Kunene oyiRetail Sector Advisor kwiKYCCI uthe umnotho waseNingizimu Afrika wasezitolo ongu-R500billion uphethwe ngabaziwa ngeBig 4 okuyizitolo ezinkulu oSpar, Pick n Pay, Woolworths noShoprite/ Checkers.
Uthe lezi zitolo azilethi ukuncintisana okuhle emalokishini ngoba oSpar badayisa ukudla, inyama, amakhekhe, izinkwa, imifino, utshwala futhi banamakhemisi abo.
“Izitolo zasemalokishini ngeke zincintisane nezitolo ezinkulu ezinxanxatheleni zezitolo ngoba zixoxisana nabalimi zibafundise ukwenza imikhiqizo ,” kusho uKunene.
USihlalo weCompetition Commission, uSolwazi Halton Cheadle, uthe bazoba seThekwini kuze kube nguLwesihlanu bathole imibono yomphakathi nosomabhizinisi ngodaba lokuvulwa kwezinxanxathela zezitolo emalokishini nasemakhaya.
Uthe baqale eKapa ngoMeyi badlulela eGauteng ngoJuni njengoba sebeseThekwini kanti bazoqoqa zonke iziphakamiso bese benza umbiko ozokwethulwa ePhalamende. Uma kukhona isidingo sokuthi akuguqulwe imithetho ethile izoguqulwa ukuze kube nokuncintisana okuhle.
Uphethe ngokuthi abantu akufanele babuke izithangami zokucobelelana ngolwazi njengezinto zokuchitha isikhathi ngoba iCompetition Commission iyawenza umsebenzi wayo futhi kujeze abantu okufanele bajeze noma bahlawuliswe njengoba kwenzekile emabhange.