Kuzoxoxwa ngabangase babe umengameli we-ANC
UMBANGO ngozokhethelwa isikhundla sokuba nguMengameli we-ANC uzophinde ushise phansi uma izincithabuchopho eziqhamuka emikhakheni ehlukene zibhunga ngabaholi amagama abo adamane evela emithonjeni yabezindaba.
Lokhu kushiwo uMnuz Xolani Dube, umsunguli wesikhungo i-Xubera Institute esihlela izingxoxo emphakathini.
Ngaphandle kokuba wumsunguli weXubera, uDube ungumhlaziyi wezepolitiki ozimele.
Ephawula ngenkulumompikiswano ezobe ingoJulayi 13 eHilton Hotel eSandton, eGoli, uDube uthe kuzobe kudingidwa imithombo yabezindaba ukuthi ngabe yenza ubulungiswa yini uma igqamisa abaholi abathile abazongenela umbango wesikhundla kodwa ngakolunye uhlangothi, kube khona abangagqanyiswa.
Phakathi kwezikhulumi uDube athe kulindeleke ukuthi zihlanganyele kwinkulumompikiswano, ebizwa ngokuthi Cyril or Nkosazana! SA Media – The Dictatorship of no Alternative, woSolwazi abazimele, abavela emkhakheni wezobuntatheli, abavela emkhakheni wezokuxhumana abazimele nabanye.
“Kuzobe kubhekwa iqhaza elibanjwe abezindaba embangweni ozayo wesikhundla sikamengameli we-ANC,” kuchaza uDube.
Uthe phakathi kwezinto ezizobe zibhekwa wukuthi yini edala ukuthi kubaholi ababalelwa embangweni kube khona okubhalwa kakhulu ngabo emithonjeni yezindaba bese kuthi kwabanye kungabi njalo. Uthe abaholi okuzobe kukhulunywa ngabo abazobe bebanga isikhundla, nguMnuz Cyril Ramaphosa, iphini likaMengameli wezwe, uDkt Nkosazana Dlamini Zuma, oyilungu lesigungu esiphezulu kwi-ANC, Mnuz Mathews Phosa, owake waba umgcinimafa we-ANC, uNksz Lindiwe Sisulu, onguNgqongqoshe wezokuHlaliswa kwaBantu noNksz Baleka Mbete, onguSomlomo wePhalamende. Abanye uDkt Zweli Mkhize, onguMgcinimafa we-ANC, noMnuz Jeff Radebe, onguNgqongqoshe ehhovisi likaMengameli wezwe. “Umbuzo usekutheni kungani kugqanyiswe laba abayisikhombisa kuphela. Nakhona kukhona abagqanyiswa kakhulu kunabanye,” kuchaza uDube.
Uthe nakuba uRamaphosa noDkt Dlamini Zuma bethwelwe ngeqoma, kubalulekile ukuthola ukuthi kwaziwe ukuthi yini eholela kulesi simo.
Nakuba bekhona laba abayisikhombisa okuzokhulunyelwa phezu kwabo, uDube uthe abaholi abasazoqhamuka emva kwalaba asebebaliwe, sebezozithola bedonsa kanzima ekutheni bathole ukunakwa kakhulu ngabezindaba.
“OkukaRamaphosa noNkosazana kubukeka kungeke kusajika ukuthi kube abantu okucatshangwa ukuthi bangase bathathe isikhundla sokuba ngumengameli. Omunye obonakala elandela ezithendeni zabo uRadebe.”
Kulindeleke ukuthi kuqale ngoSepthemba ukuphakanyiswa ngokusemthethweni kwamagama abantu abazongenela isikhundla sikamengameli we-ANC uMnuz Jacob Zuma azosishiya ngoDisemba uma sekunengqungquthela yokukhetha ubuholi benhlangano obusha.