Kushone isikhulu sebhange Ithala
KUGCINE kusenele isikhulu esabuyisa uzinzo ebhange Ithala, uNkk Yvonne Zwane, emuva kokuphathwa ngumdlavuza isikhathi eside.
UNkk Zwane ushonele ekhaya ngoLwesihlanu emuva kokukhishwa esibhedlela ngoLwesithathu olwedlule.
UNgqongqoshe wezokuThuthukiswa koMnotho, ezokuVakasha neMvelo KwaZuluNatal, uMnuz Sihle Zikalala, uthe balahlekelwe ngokushona kukaNkk Zwane ngoba ufike eThala washintsha izinto.
“Ngiyazwelana nomndeni kaNkk Zwane ngoba ufike eThala washintsha isimo, wathola umbiko womcwaningi mabhuku ongenawo ugcobho iminyaka emithathu ilandelana. Ubengumuntu okhaliphile, ezimisele ngomsebenzi wakhe futhi eyiphethe kahle imali. Bengisebenzisana naye njengoba eyisikhulu esiphezulu eThala futhi ubehlala ezimisele,” kusho uZikalala.
Uthe uNkk Zwane ulishintshile Ithala elenza libe yindawo ebhekelele izidingo zamakhasimende futhi usebenze kanzima ukuqinisekisa ukuthi Ithala lithola ilayisensi ezolenza likwazi ukuncintisana namabhange amakhulu.
UZikalala uthe isicelo sokuthi Ithala libe yibhange elikhulu sifakwe ngoNovemba wonyaka odlule nguNkk Zwane kanti ushona nje sekuqalwe izinhlelo eziningi zokuqinisekisa ukuthi Ithala lithuthukisa abantu ababencishwe amathuba phambilini.
UNkk Zwane waba ngumuntu wesifazane wokuqala ukuphatha Ithala selokhu lasungulwa eminyakeni engu-57 edlule, wangena emuva kokuhamba kukaMnuz Sipho Shabalala.
Ngaphambi kokuza eThala uNkk Zwane wayephethe kwa-FNB KwaZulu-Natal enebhajethi ka-R20 billion.
Okwamanje azikakenziwa izinhlelo zomngcwabo wakhe kwazise umndeni ubusahlangene ukudingida lokhu.