Kusolwa iZama Zama ngokufa kukamaskanda
KUSOLWA umbango wokumbiwa kwegolide-mbumbulu emayini yaseBenoni, eGoli, okwaziwa ngeZama Zama ngokufa kukamaskanda uSinothiseni ‘Zinothi’ Khanyile waMabhoza neZintatheli.
Ngokusho komthombo obusondelene nomufi, uZinothi (39) ubazi ukuthi kunabantu abamzingelayo njengoba kunomuntu obesanda kubulawa futhi kusolwa ithimba ebelisebenza noZinothi.
Udutshulwe ngentululwane yezinhlamvu washonela lapho ehlaselwe khona engasehostela abehlala kulo iDenver eGoli ngoLwesithathu ebusuku.
“Kuleya mayini sekunamathimba angezwani futhi sekufe inqwaba yabantu kubangwa ukumbiwa kwegolide. Sekubangwa nokungena ngama-shift. OZinothi bayathinteka ekufeni komunye umuntu obekwelinye ithimba,” kusho umthombo.
Nenduna yaseDenver okuyihostela uZinothi abehlala kulona, uMnuz Hambakha ‘Shalazile’ Mbatha, idalule ukuthi sekufe inqwaba yabantu ngenxa yombango emayini.
Uthe uyazi ukuthi noZinothi ubulawelwe iZama Zama ngoba ubesebantwini abebekade bemba emayini.
“Ngambona ngaphambi kokuba abulawe. Ngathi ngimbone ngayizolo (ngoLwesibili), wabulawa ngakusasa (ngoLwesithathu). Wayephuma emakhaya lapho ayebalekele khona. Ngesikhathi ehambile kwafika abantu babona imoto yakhe bayidubula kaningi bezitshela ukuthi uphakathi kanti uyishiyile. Imoto eyiQuantum eyayigcwele abahlaseli iyona esolwayo ekufeni kwakhe.”
UMbatha uthe sekunesikhathi kunempi kule mayini futhi isidlule nenqwaba yemiphefumulo.
“Kuqale kwaba yimpi ebiphakathi kwabantu abangamaShona (okungabantu abadabuka eZimbabwe) nabakuleli kodwa manje sekulwa wonke umuntu. Ngikhuluma nje sekubulawe abantu abangaphezulu kwabayisithupha baseQhudeni eNquthu. Nalaba ngibazi ngoba abangakithi, abakwezinye izindawo angibazi. Le mayini sengicabanga ukuyivala ngoba ayisasizi muntu kodwa seyibulala abantu. Ngiqale ngathi ayiyekwe ngoba abantu bebeyenza imali ngala magolide kodwa ngoba sebebulalana bodwa, ayivalwe.”
Umfowabo kamufi, uMnuz Mzwandile Khanyile, uvumile ukuthi sekufikile ezindlebeni zabo ukuthi kuthinteka umbango wokumbiwa kwegolide ngokufa komfowabo kodwa wathi akakwazi ukugxila kulokho ngoba kusengamahemuhemu.
Okhulumela amaphoyisa asesiteshini iCleveland eGoli, uSimon Manyathi, uvumile ukuthi likhona icala elivuliwe kodwa wanganda ngamazwi.
UKhanyile uthe umufi uzofihlwa emathuneni asekhaya eMfongomfongo eNquthu ngeSonto ngemuva kwenkonzo ezokuba ngo-9 ekuseni.
UZinothi uqale ukucula ngo-1996 nge-albhamu eyayithi Indodana wabuye wabamba iqhaza kuBuhle Begubhazi ngaphambi kokusebenza nomzala wakhe uMtshengiseni ‘Indidane’ Gcwensa.
Ubuye wasebenza noShewu Hlela bakhipha i-albhamu eyayithi uZinothi noShewu neZintatheli.