Isiyacasula indaba yodlame lwaseGlebe nolwasematekisini
NGOLWESITHATHU olwedlule uNgqongqoshe wezokuThutha KwaZuluNatal, uMnuz Mxolisi Kaunda, wasayina isivumelwano soxolo nezinhlangothi ezihlanganisa usoseshini wamatekisi KwaNongoma.
Ngalesi sivumelwano lezi zinhlangothi bezizibophezela ngokuthi zizokwenza konke okusemandleni ukunqanda ukuchitheka kwegazi okuhlale kuhlale kuqubuke kulo soseshini.
Akukapheli nesonto isivumelwano sisayiniwe kodwa kunomndeni onamatekisi obike ukuthi ulala emaqeleni emva kokuhlaselwa komuzi wawo ngenhlanhla kwangafa muntu ngoba babengekho kugasela abahlaseli.
Impi ephakathi kwemindeni eyisithupha igcina isikapakela ematekisini kanti kuyacaca ukuthi kuzodingeka okungaphezu kwesicucu sephepha ukuze kube nokuthula ngoba sekusheshe kwacaca ukuthi isivumelwano esisayiniwe asisho lutho.
Ukubhuntsha kwemizamo yokuthula yinto ecishe ifane nokwenzeka ehostela laseGlebelands njengoba nakhona yonke imizamo esiyenziwe kuze kube yimanje ingaphumeleli ngoba ukubulawa kwabantu kusaqhubeka futhi akekho oseke wagwetshwa ngokufa kwabantu kule ndawo.
Kumanje kunovalo lokuthi kungase kuphinde kube khona ohlaselwayo njengoba ngokodaba esilushicilele izolo sekukhona abantu asebehlawulisa abahlali basehostela uR50 okuthiwa owokweseka amasoka ngokubulala ehostela.
Ngokwemibiko yaphambilini, uma kuke kwaqala ukuhlawuliswa kwabantu, okulandelayo kuba ukuhlaselwa kwabanye babo. Vele le nto yokukhokhisa abantu inochuku ngoba kungashiwo kanjani ukuthi abantu abasolwa ngokubulala ezinye zezihlobo zabahlali basehostela abalekelelwe ngabantu okungenzeka ukuthi babahlukumeza ngezenzo zabo?
Indaba yodlame lwamatekisi nokubulawa kwabantu eGlebelands ngezinye zezinto uhulumeni waKwaZulu-Natal osuhlulekile wukuzixazulula. Ukube iqiniso likhona kufanele ngabe kukhona ezikhulwini zikahulumeni asebakhonjwa indlela ngalokhu. Okucasula kakhulu wukuthi ababulali bayaziwa kodwa ukuthi kungani bengashushiswa yinsumansumane.
Kudingeka okungaphezu kosekwenziwe ukulwa nalesi sihlava futhi yinto okufanele iqhamuke kuhulumeni.