Ongakayiboni i-EFF uyogcina eyibonile
MHLELI: Kwelakho lodumo eliwela umfula ugcwele ngivumele ngihlube udlubu ekhasini ngokufike kwenziwa yiqembu i-EFF eliholwa uMnuz Julius Malema (osesithombeni). Leli qembu lithe lifika abantu baseMzansi basho konke ngalo, abanye beligxeka abanye belitusa. Kodwa ngizoke ngigxile kulaba abakade beligxeka belibiza ngeqembu elidelelayo, elingamahlongandlebe, nelizoshabalala maduze nje. Kodwa kule minyaka ebalelwa kwemine lifikile izigi zalo ziyezwakala. Angikhathali noma uyalithanda noma uyalizonda kodwa iqiniso ukuthi lifike kwezepolitiki eNingizimu Afrika kwezwakala.
Uma ngingase ngibale izinto ezimbalwa nje ezivumbululwe ukuba khona kwalo ePhalamende, noma beyisibalo esincane ePhalamende, bafike bavula abantu amehlo ngenkohlakalo eyenzekayo. Ubani owayazi ngomuzi waseNkandla, nowaphoqelela ukuba uMengameli uMnuz (Jacob) Zuma aphoqwe ukuba akhokhe ukube i-EFF yayingekho? Ubani owaphumela obala wakhononda ngomndeni wakwaGupta otitiliza imali yaseNingizimu Afrika usebenzisa amandla ngendlela engamukelekile, ukube i-EFF yayingekho? Ubani oqhamuke nokuthi umhlaba mawubuyele kubaniniyo ngaphandle kwesinxephezelo ngaphandle kwe-EFF? Angithi yaze yazama ukunikela ngephesenti layo ePhalamende ukuze kushintshwe uMthethosisekelo wezwe? Kuyimanje angithi nezinye izinhlangano kubalwa nayo ebusayo qobo, sezikhuluma ulimu olufanayo? Ukube i-EFF ayifikanga ingabe iyakhulunywa yini le ndaba yomhlaba na? Impendulo ikuwena mfundi nonembeza wakho.
I-EFF ithe uma ifika yathi emhlahlandleleni wayo wokhetho, abayokhethwa babe ngamakhansela ayo, ayokhetha ukusebenzela yona inhlangano ashiye eminye imisebenzi eseceleni, abhekane nomsebenzi owodwa, adedele abanye amathuba kweminye imisebenzi.
Hhayi lokhu esikubona kwenzeka kwezinye izinhlangano lapho uthola uthisha efundisa esikoleni, abe yikhansela, aphinde futhi anikwe umsebenzi wokuphakela ukudla ezikoleni. Yini umgolo? Awudedeli ngani abanye abantu benze eminye imisebenzi kule emithathu oyenzayo na?
Kukhombisa ngokusobala ukuthi awuwukhathalele umphakathi kodwa ukhathalele ugovane wakho nje qha. Kodwa i-EFF ithi khetha okukodwa.
Sengiphetha nje, ngiyazi ukuthi kulokhu esengikubalile bakhona abathi yebo uqinisile umlobi, kodwa indlela eyenza ngayo neveza ngayo amaqiniso i-EFF ayinambithisiseki phambi kwamehlo abanye abantu.
Yebo isiZulu sithi akukho soka lingenasici kodwa lona lisuke liyididile intombi yaliqoma. I-EFF ngithi nongayiboni uyoze ayibone, namaqiniso ewavumbululayo aseyaqala nokuyithola indawo ezinhliziyweni zabaningi.
Khumbulani Nene UMGUNGUNDLOVU, IKHANSELA LE-EFF