UZimdollar uyazishaya izimemezelo zomshado
MHLELI: Ngicela ukubingelela kulo lonke elikaMthaniya bese ungivumela ngibeke umbono wami kwelakho elihamba phambili.
Ngike ngazinikeza isikhathi ngalalela umsakazi woKhozi FM, uZimiphi “Zimdollar” Biyela (osesithombeni) esakaza izimemezelo zomshado ngeSabatha.
Ngezwa umehluko omkhulu ohlelweni oselunesinye isigqi manje. UZimdollar unomfutho kakhulu uma umqhathanisa noThembeka Zondo obekade elwenza.
Ngicela usisi uThembeka angangizwa kabi ngoba naye ubezama kodwa manje kusho khona ukuthi unephimbo eliphansi kanti uhlelo ludinga umsakazi onjengoZimdollar olusakaza ngesinye isigqi, alunonge ngomfutho, akuthathe akubeke ngamehlo engqondo emshadweni.
UZimdollar uyasanelisa singabalaleli, uyazinikeza nesikhathi sokufunda imilayezo kuFacebook. Uyakuqonda ukuthi abalaleli basuke beyithengile i-data ukuze babhale kuFacebook behalalisela abanemicimbi eyahlukene.
Sisi wami Zimdollar qhubeka nokwakha ubudlwelano nabalaleli bakho oKhozini. Uwena wedwa umsakazi wokhozi ozinikeza isikhathi sokufunda okubhalwe ngabalaleli. Lokho ukwenza kubonakale ukuthi awugcini icala. Uma ufunda kuyezwakala ukuthi abekho abalaleli obashiya ngaphandle uyifunda yonke imiyalezo abayithumele.
Angicele nje ezikhulwini zomsakazo ukuthi zingamsusi uMadoladola kulolu hlelo ngoba ufike wangena khaxa. Asimdingi umsakazi olele ohlelweni lwezemishado, sifuna umsakazi onomfutho njengaye nje uMadoladola. Phambili ngoZimiphi, phambili! Uyayenza into yakho, siyabongela kakhulu nabazali bakhe abazala igagu lentokazi. Sizwe Ndlovu EMFEKAYI, KWASJULA