Imbangela yokugqunqa komzimba
MASIQAPHELE ukugqunqa komzimba nezilonda ezingapholi. Iningi lethu liyaye lizibuze njalo uma libona umzimba wakho usushintsha ugqunqa uba mnyama, okanye uma sibona umuntu obenebala elithile bese lishintsha ngendlela engaqondakali. Kwabanye uyaye ubone uma enesilonda emzimbeni bese sithatha isikhathi esiwundendende ukuphola.
Namhlanje sizokhuluma sibhekise ezimbangeleni zalezi zimo zokugula, ngaphandle kokucabanga ukuthi umuntu lowo unesifo sikashukela, okanye unegciwane lengculazi, uthwetshuliwe noma unomklwebhelo osuka emndenini noma komakhelwane.
Emizimbeni yabantu nezilwane kunezindlala ezihlala zibe yizigqoko ezinsweni zombili.
Lezi zindlala zikhiqiza izinhlayiyana (hormones) ezigeleza zingene egazini bese zenza imisebenzi ebaluleke kakhulu ezingxenyeni ezahlukene zomzimba.
Imisebenzi yalezi zinhlayiyana:
Ukulawula ukushaya kwenhliziyo
Ukulawula ukwethuka komzimba
Ukulawula ukugaywa kwezidlo ezithile emzimbeni
Ukulawulwa kwamaswayi emzimbeni
Ukulawula ukukhiqizwa kwebala elimnyama emzimbeni
Ukulawula ukuhluma nokuphola kwesilonda emzimbeni
Ukulawula ukuncipha nokukhuluphala komzimba
Ukulawula ukulangazelela nokungabi nendaba nocansi emzimbeni
Ukuba nokwenza nokuvuka kwenduku nokuhalela ucansi kowesifazane
Ukulawulwa kobuthongo nokungabibikho kwabo
Enye yalezi zinhlayiyana (hormones) kuba ngumkhiqizo okuthiwa yi-cortisol.
Le nhlayiyana yenza eminye yale misebenzi ebalwe ngenhla, futhi empeleni yiyona enomsebenzi omningi nobalulekile emzimbeni.
Kuyenzeka ukuthi le ndlala ingakwazi ukukhiqiza i-cortisol futhi baningi abantu ababa kulesi simo. Nawe uyazibonela ukuthi uma le nhlayiyana ingakhiqizwa lezi zimo ezilawulwa yiyo ezingenhla, kusho ukuthi ziyafadalala, bese kuyaqala ukugula.
Cabanga nje uma ukushaya kwenhliziyo kungasalawuleki, ukwethuka komzimba; nokunye.
Isikhathi esiningi imbangela yokwehla kwalo mkhiqizo emzimbeni kuba wumzimba uqobo lapho usuhluleka ukubona ukuthi le ndlala ingeyalapha ekhaya kulo mzimba, bese umzimba usuyiququda uyibeke eceleni(Addison’s Disease).
Ngaleyo ndlela lo mkhiqizo uyehla emzimbeni bese kuyaqala ukugula.
Enye imbangela yisifo se-TB esihlasela lezi zindlala noma kube yigciwane le-HIV.
Kungenzeka futhi ukuthi ukushoda kwegazi eliya kulezi zindlala noma ukulimala kwemizwa elawula lezi zindlala, uma lokhu kuye kwaphunduleka; lo mkhiqizo oyi-cortisol uyokwehla, bese ukugula kuqala kukunethe.
Ukugula ngale ndlela kushiyana izikhawu ngezikhawu.
Njengoba isihloko sethu sibalula ukushintsha kwebala emzimbeni, nezilonda ezithatha kade ukuphola, nokukhathala komzimba okungayiwayo, okuba khona ngisho wazi kahle ulale isikhathi futhi singekho esinye isizathu esingakwenza ukhathale ngaleyo ndlela; lezi yizimpawu ezibalulekile ngoba uma singekho esinye isizathu esingenza ukuthi isilonda siphuze ukuphola, okanye isizathu esingenza ibala ligqunqe lize libe mnyama; amabombo azokhomba kulesi sifo esidalwa ukwehla kwe-cortisol.
Ngiyafisa ukukusho ukuthi ngenxa yokuthi lesi sifo siphoqa ukuthi udokotela wakho ahlale amehlo esibhekile ukuze ukwenza kusheshe kujule kulesi sifo khona uzokwazi ukuthola ukwelapheka ngokushesha, baningi kakhulu abantu abalimalayo ngenxa yaso, baningi abaze basishiye emhlabeni ngenxa yaso.
Bebaningi nabafowethu nodadewethu abanalezi zilonda ezithatha kancane ukuphola, okanye ababa nombala omnyama noma agqunqe emzimbeni; kodwa sikuthalalise sikwethe zonke izithakazelo zezimbangela agcine umuntu eshonile.
Empeleni uma lesi sifo siye sadlulela phambili kakhulu(Adrenal Crisis); ogulayo uvele:
Umfutho wegazi wehle kakhulu ungalawuleki akhathale Ajuluke Aphele Amandla Ubuhlungu eqolo ngemuva, nasesiswini
Ome aqhaqhazele Kuleli zinga isimo sisuke sesisibi kakhulu, sekudingeka kwenziwe konke ngokushesha ukuze usinde umphefumule. Kodwa kuze kufike lapha nje, izimpawu ziba lokhu zikhona, ubunzima kuba ukuthalalisa kwesiguli, isiguli esiqala kwezinye izindlela zokwelapha, kanye nokukucabangela okunye ukufa singanakwa lesi sifo ngudokotela okwelaphayo.
Okumnandi nokuhle ukuthi lesi sifo siyelapheka, inqobo nje udokotela kumele afunele ‘nganeno’. Uma kungukuthi udokotela wakho usakukhomba ngapha nangapha, zincenge umkhombise izimpawu ozibonayo, nanokuthi wena ucabanga ukuthi uguliswa yini.
Odokotela abaningi bakhulile bavuthiwe futhi bandlalekile ngokomqondo, bayokulalela basebenzisane nawe ukuze welapheke.
Bakhona ke nabalingani abangodokotela abayokukhahlaza, bakuphoxe bangafuni ukuzwa umbono wakho ngokugula kwakho, nalabo obobabekezelela ngoba yimpilo yakho, futhi awuzukuphila kabili.
Mpilonhle Mpilonde!