Kukhuthazwa abantu ukuthi baye kwaSars
ABAQOQI bentela iSouth African Revenue Service (Sars) bagqugquzele bonke abantu baseNingizimu Afrika ukuthi bayofaka imininingwane yabo yokukhokha intela kuwo wonke amahhovisi ale nhlangano njengoba seluvuliwe uhlelo lokuqoqa intela.
Esitatimendeni esikwi-website yakwa-Sars baveze ukuthi uhlelo lokuqoqwa kwentela luvulwe ngoMgqibelo kubantu abafaka imininingwane yabo kwi-internet kanti kwabafuna ukuziyela emahhovisi akwa-Sars imininingwane iqale ukuqoqwa izolo.
Baveze ukuthi ngonyaka odlule bangu-6.31 million abantu abakhokhe intela kanti bathi kubalulekile ukuthi abantu bakhokhe intela ngoba imali yabo isetshenziswa ukuthuthukisa iNingizimu Afrika.
Akubona bonke abantu abafanele ukukhokha intela noma ukuya emahhovisi akwa-Sars ukuze bakhokhe intela, nalu uhlu lwabangakufanele ukukhokha.
Abantu abahola u-R350 000 ngonyaka akufanele bakhokhe intela.
Abasebenzela umqashi oyedwa ngonyaka futhi behola kancane akufanele bakhokhe.
Uma behola ngaphansi kuka-R350 000, bengazitholi izibonelelo ezifana no-car allowance, business income bengasebenzi kwenye indawo futhi bengenazo izindlu zomqasho.
Uma umuntu engenayo i-medical aid, retirement annuity nama-travel expenses.
Uma uya kwa-Sars kufanele uphathe lokhu
IRP5/IT3(a) ephuma kumqashi wakho noma esikhwameni sakho sempesheni.
Isitifiketi sokulondoloza imali bayakwazi olondoloza kubo ukuthi kufanele uhambise iphepha elithile kwa-Sars.
Izitatimende zokusebenza kwemali uma ungusomabhizinisi noma uzisebenza.
Kumele uphathe ne-log book uma uthola i-car allowance noma i-travel allowance enkampanini oyisebenzelayo.
Uma ulondoloza imali yakho kwamanye amazwe kumele uphathe amaphepha afakazela lokhu.
Ungawukhohlwa umazisi wakho, incwadi enekheli lalapho uhlala khona ngoba kuyadingeka kwa-Sars.
Qaphela ungaqolwa ngabathi bazokulekelela ukuthi uthole imali kwa-Sars futhi ungawaphenduli ama-sms afuna izinombolo zakho zasebhange. Abakwa-Sars bathe abasoze bacela abantu ukuthi bafake imininingwane yabo yasebhange kwi-sms .
Uma usola ukuthi kunabafuna ukukuqola thinta abakwa-Sars ku-0800 000 2870 noma ku-0800 00 7277.
Njengoba isikhathi sokukhokha intela sesiqalile sizovalwa ngoSepthemba kulabo abaziyela emahhovisi akwa-Sars bese labo abafaka kwi-internet (e-filing) kuvalwa ngoNovemba 21. Lizoba khona iwindi elizovulelwa abenza izinto ngomzuzu wokugcina kwi-efiling njengoba bezonikezwa kuze kube nguJanuwari 31 wonyaka ozayo.