IMeya inomkhankaso wokufukula umnotho waseNdumeni
IMEYA kaMasipala waseNdumeni, uMnuz Sboniso Mbatha, inxusa osomabhizinisi ukuba babambe iqhaza emkhankasweni wayo wokufukula umnotho wendawo.
Ekhuluma nosomabhizinisi ngesikhathi kunendlakusasa, uthe uzibophezele ekutheni afukule umnotho wedolobha kodwa wathi lokho ngeke akwenze yedwa.
“Ngiyafisa ukuthi osomabhizisi bethu bafake igxalaba emizameni yethu yokushintsha indawo yethu ohlangothini lwezomnotho,” kusho uMbatha.
Uthe iNdumeni ihanjelwa kakhulu abavakashi abasuke befuna ukuthola umlando ngezimpi zikaZulu namaNgisi ezalwelwa emhlabathini wabo.
“Kumele ithuba lokuhanjelwa izivakashi silisebenzise ngokuthi senze isiqiniseko sokuthi siyawuthuthukisa umnotho.”
UMbatha unxuse zonke izinhlaka ukuba zibambisane egameni labantu baseNdumeni.
“Kubakulekile ukubambisana ngoba lokho kwenza umsebenzi ube lula.”
Uthe isabelomali sabo sika-R323 million basihambisile emphakathini beyozwa ukuthi udingani.
UMbatha uthe ujabule ngokuthi isabelomali sabo sikwazi ngisho nokuhlangabeza i-ward entsha ebekhona ngemuva kokuklanywa kabusha kwemingcele.
Uthe kukhona imali ewu-R14 million ebhekele izinhlelo ezifaka nokuphendulwa kwamasoyi nokwakhiwa kwamahholo.
“Kukhona nezinhlelo zokufakwa kukagesi ezinesabelomali sika-R9 million.”
UMbatha uthe uzoba ngumholi wokuqala ukuguqula isimo sendawo yaseNdumeni. Banesabelomali sika-R90 million esibhekelele izinhlelo eziseqhulwini okumele ziqhutshwe.
“Phakathi kwalezo zinhlelo kukhona ebezihlelelwe ukuthi zenziwe iminyaka emithathu kodwa bona abazozenza unyaka owodwa.”
Selokhu bengenile ehhovisi ngenyanga yokuqala sebefake imigqomo ewu-500 kadoti.
“Okunye okunconywa wumphakathi ngathi yindlela esiqasha ngayo ezinhlelweni zemisebenzi yamatoho.”